Hartuesi i Kushtetutës, Arsim Bajrami i gatshëm si kandidat konsensual për President të Kosovës

Thursday, 26 February 2026 19:11

• Written by Mexhis

Ish-ministri i Administratës Publike dhe i Arsimit, Arsim Bajrami, ka shprehur gatishmërinë për të garuar për president të Kosovës, duke pretenduar se i plotëson kushtet e një kandidati konsensual, në një kohë kur vendi duhe të nxitojë për ta zgjedhur presidentin e ri.

Kuvendi i Kosovës ka kohë vetëm deri më 4 mars për ta zgjedhur presidentin e ri, pasi presidentes së tanishme, Vjosa Osmanit, i përfundon mandati në prill. Bajrami e kërkoi mbështetjen e partisë në pushtet, Lëvizja Vetëvendosje (LVV), dhe të partive opozitare Partia Demokratike e Kosovës (PDK), Lidhja Demokratike e Kosovës (LDK) dhe Aleanca për Ardhmërinë e Kosovës (AAK), përmes një shkrimi në Facebook të enjten.

Ai tha se është i gatshëm të bëhet president duke qenë në dispozicion të institucioneve, të spektrit politik dhe të qytetarëve të vendit si kandidat konsensual. “Me bindje se i plotësoj kushtet profesionale, politike dhe morale për një kandidaturë konsensuale në funksion të unitetit politik dhe funksionimit kushtetues të institucioneve të Republikës së Kosovës”, shkroi Bajrami.

Bajrami – i cili është ndër hartuesit e Kushtetutës së vendit – duhet t’i sigurojë të paktën 30 nënshkrime të deputetëve për të garuar, ndërsa dy të tretat e votave në Kuvendin me 120 vende për t’u zgjedhur.

Nuk është e qartë nëse ai do ta gëzonte një mbështetje të tillë.

Bajrami u largua nga politika më 2019, kur dha dorëheqje nga PDK-ja pas rreth dy dekadave në shërbim të kësaj partie. Deri tani vetëm PDK-ja nga partitë politike ka thënë se mund të vijë me një kandidat, por nuk ka zbuluar emër, ndërsa presidentja Osmani e ka bërë të qartë se kërkon një mandat të dytë pesëvjeçar.

Ndërsa, anëtarë të familjes së heroit të Kosovës, Adem Jashari, e kanë mohuar se kanë qëllim për të garuar për president, pasi ministri i Jashtëm, Glauk Konjufca, tha të mërkurën se, nëse do të vinte një emër nga kjo familje, do të ishte një “konsensus automatik” në shoqëri.

Mungesa e një marrëveshjeje mes partive parlamentare dhe paqartësia nëse Osmani do ta fitojë mbështetjen e nevojshme për t’i rizgjedhur, kanë bërë që vendi të rrezikojë të futet në një krizë të re. Dështimi për ta zgjedhur presidentin e vendit para 4 marsit do të nxiste zgjedhje të parakohshme parlamentare për herë të dytë brenda muajsh.

Kosova u përball me krizë politike e institucionale tërë vitin 2025, që i kushtuan me mungesë fondesh ndërkombëtare e vonesa në kalimin e buxhetit për vitin e ri fiskal.

Bajrami e arsyetoi vetofrimin si kandidat për president duke u bazuar “në përvojën time shumëvjeçare në të gjitha fazat kyçe të shtetndërtimit të Kosovës që nga viti 1990, përfshirë rezistencën institucionale, ndërtimin e rendit kushtetues dhe proceset vendimtare të tranzicionit politik”.

Ai shtoi se veprimtaria e tij politike, juridike dhe institucionale, si dhe përvoja në negociatat ndërkombëtare për lirinë e Kosovës në Rambuje më 1999 dhe për pavarësinë e saj në procesin e bisedimeve të Vjenës, e bëjnë atë po ashtu kandidat të duhur për president.

Gjatë karrierës së tij rreth 20-vjeçare në politikë, Bajrami shërbeu si ministër i Administratës Publike nga vitit 2008 deri më 2010, si ministër i Arsimit nga viti 2014 deri në vitin 2017, si dhe si deputet në tri legjislatura të ndryshme.

Ai është gjithashtu anëtar i Akademisë së Shkencave dhe Arteve të Kosovës, asaj të Shqipërisë, si dhe i Akademisë Evropiane të Shkencave dhe Arteve.

Deklarata e fortë/ William Walker: Zëvendësi im koordinohej me Beogradin

Thursday, 26 February 2026 12:19

• Written by Mexhis

Ish-shefi i Misionit Verifikues të OSBE-së, William Walker, ka treguar për tensionet që ka pasur me zëvendësin e tij francez gjatë misionit në Kosovë, Gabriel Keller, i cili më pas u emërua ambasador i Francës në Serbi.

Sipas Walkerit, zëvendësi i tij kishte një qasje të ndryshme për situatën në terren dhe shpesh koordinohej me autoritetet në Beograd. “Me zëvendësin tim francez kam pasur problem. Ai koordinohej me Beogradin dhe më pas u bë ambasador i Francës në Beograd. Ai mendonte që unë po tejkaloja rolin tim duke folur hapur, duke ngritur zërin”, u shpreh Walker në një intervistë dhënë për “A2CNN”.

Ai tregoi edhe një incident që lidhej me një deklaratë të raportuar në media, pas një vizite të zëvendësit të tij në Paris.

“Ka pasur një incident, kur ai shkoi në Paris dhe foli me një gazetar. Gazetari raportoi se unë nuk kisha qenë i saktë në deklaratat e mia. Kur u kthye në Prishtinë, më tha që ishte keqinterpretuar nga mediat dhe nuk kishte thënë asgjë që kundërshtonte deklaratat e mia,” rrëfeu ish-diplomati amerikan. Walker theksoi se kjo çështje nuk u sqarua kurrë plotësisht dhe se marrëdhënia mes tyre mbeti e tensionuar. “Nuk e sqarova kurrë plotësisht nëse ishte gazetari që kishte raportuar gabim apo zëvendësi im që kishte bërë deklaratë të tillë, por gjithmonë kam pasur problem me të, sepse ai mendonte se unë isha i njëanshëm. Kjo nuk ishte e vërtetë. Ajo që thosha ishte e bazuar vetëm në atë që pashë: pashë një masakër, një krim lufte,” shtoi Walkeri.

Murat Jashari: Do të bëhesha President i Kosovës vetëm në një gjendje të jashtëzakonshme

Wednesday, 25 February 2026 21:29

• Written by Mexhis

Murat Jashari, djali i Rifat Jasharit, në një intervistë ekskluzive për VOX Kosova ka thënë se nuk është i interesuar të bëhet president i Kosovës, edhe pse emri i tij u përfol këto ditë nga qarqe politike, meqë më 4 prill i përfundon mandati presidentes Vjosa Osmani, derisa i riu duhet të zgjidhet më së largu deri më 4 mars.

“Partitë po shprehin gatishmërinë e tyre, ato po shpresojnë në këtë çështje. Unë i falënderoj që na besojnë ose më besojnë për pozita të tilla. Por ua kam bërë të qartë se cilat janë arsyet pse unë nuk e bëj, sepse mbi supet e mia rëndon një barrë e madhe”, tha Jashari.

Ai ka theksuar se këtë pozitë do ta pranonte vetëm në gjendje të jashtëzakonshme, teksa ka shtuar se gjithmonë është i gatshëm, nëse është nevoja të sakrifikohet për vendin.

“Vetëm në gjendje të jashtëzakonshme, ruana Zot ndonjë luftë civile, ndonjë rrezik i madh kombëtar ku cenohet bërthama e kombit tonë dhe e vendit tonë, atëherë kush jam unë të mos sakrifikohem për këtë vend? Pra, unë jam gjithmonë i gatshëm, me gjithë fëmijët që m’i ka falë Zoti, të sakrifikohem për këtë vend. Ama jo ta keqpërdor emrin e familjes Jashari për pozita personale. Këto duhet t’i kuptojë opinioni i gjerë”, potencoi ai.

“Mes të qenit në pozita publike dhe profesionit që kam, si dhe pjesës së familjes që jam, unë i zgjedh këto të fundit. Partitë politike, ose politika nëse e përkthejmë me gjuhën tonë të bukur shqipe, i bie menaxhim i punëve publike. Pra, ata që dalin në zgjedhje e kanë për obligim, sepse marrin besimin dhe taksat e qytetarëve. Në politikë jemi për t’i menaxhuar këto dy gjëra dhe ata duhet të gjejnë zgjidhje për këtë punë, sepse e kanë besimin dhe taksat e qytetarëve”, shtoi Jashari./ Vox Kosova

Kurti shpall 1 miliard euro për mbrojtjen, fabrikë armësh në Gjakovë dhe synim të qartë: NATO dhe BE!

Wednesday, 25 February 2026 18:07

• Written by Mexhis

Kryeministri i Kosovës, Albin Kurti, ka thënë se rajoni i Ballkanit Perëndimor do të stabilizohet vetëm kur të zbehet ndikimi rus, veçanërisht në Serbi dhe Republika Sërpska.

“Brenda gjashtë vendeve të Ballkanit Perëndimor nuk ka as vullnet e as kapacitet për dhunë ndërshtetërore. Problematike është ndikimi hibrid i Rusisë përmes energjisë, ushtrisë dhe mediave. Ndryshimet e vërteta varen nga forcat demokratike në Serbi”, ka thënë Kurti në një intervistë për mediumin zviceran “NZZ”.

Kurti ka thënë se Kosova do të ndajë një miliard euro për mbrojtje.

“Do të krijojmë baza industriale, ndër të tjera me një fabrikë municioni në Gjakovë”, tha Kurti.

Ai ka thënë se Kosova e ndjek një model të Suedisë dhe shteteve baltike në organizimin e forcave të armatosura.

“Në organizimin e forcave tona të armatosura orientohemi më shumë nga modelet e Suedisë dhe shteteve baltike, veçanërisht në konceptin e mbrojtjes gjithpërfshirëse. Pozita e tyre është e qartë: Kur ke një fqinj të madh, duhet të mendosh ndryshe”, tha Kurti. “Ne nuk mund të përballojmë kaos përballë një kërcënimi. Na duhet rend i qartë. Çdo qytetar dhe qytetare duhet të dijë saktësisht se çfarë roli merr në rast katastrofe apo lufte”.

Ai po ashtu përmendi edhe modelin e Polonisë, për “trajnime të përgjithshme sigurie për të gjithë, veçanërisht për t’i trajnuar të rinjtë”.

Kurti ka thënë se orientimi i Kosovës është i qartë: Perëndimi.

Ai ka thënë se Kosova dëshiron të anëtarësohet në NATO dhe Bashkim Evropian.
“Ne duam të bëhemi anëtar të NATO-s. NATO aktualisht ndodhet në një fazë riorganizimi dhe ne duam pos të përfitojmë edhe të kontribuojmë. Po krijojmë një forcë rezervë vullnetare, kemi dyfishuar numrin e ushtarëve, trefishuar shpenzimet për mbrojtje dhe katërfishuar trajnimin e oficerëve tanë në kuadër të NATO-s. Kosova duhet dhe do të jetë në gjendje të mbrohet vetë. Ne nuk e shohim veten si forcë e izoluar, por si pjesë e NATO-s. Prandaj po sigurojmë pajisje ushtarake nga shtetet e NATO-s – nga armët antitank deri te dronët dhe artileria mobile. Ushtria jonë po merr kapacitete modern në këto fusha”, tha Kurti. “Ne nuk balancohemi mes Lindjes dhe Perëndimit. Ne jemi qartësisht të përkushtuar ndaj vlerave të demokracisë perëndimore. Duam të hyjmë në BE dhe NATO”.

Kurti ka thënë se nga Turqia, që është anëtare e NATO-s, Kosova ka blerë dronë Bayraktar TB2 e po ashtu sisteme tjera. Ndërsa për Rusinë, tha se Kosova ka pasur gjithmonë një distancë të shëndetshme.

Sa i përket Serbisë, Kurti në intervistë për “NZZ” tha se ajo më nuk mund ta bllojë integrimin evropian të gjithë rajonit.

“Serbia nuk ka më ‘fuqi vetoje’ mbi rajonin”, tha Kurti.

Ai ka thënë se deri tash Bashkimi Evropian është marrë me atë se kush mund të anëtarësohet dhe jo kush dëshiron të anëtarësohet.

“Unë angazhohem për një politikë të vullnetit, e jo të pranimit. Deri tash, Brukseli është përqendruar shumë te kush mund të pranohet – më pak te ajo se kush dëshiron të anëtarsohet. Nga gjashtë vendet e Ballkanit Perëndimor, pesë duan të futen në BE – me përjashtim të Serbisë. Vendimtare është: Kush dëshiron të anëtarësohet, të mbështetet. Kosova është duke iu përgjigjur me disiplinë pyetësorit të Komisionit Evropian – janë mijëra pyetje. Ky proces integrimi forcon veçanërisht drejtësinë dhe administratën”, tha Kurti.

Kurti ka thënë se përballë kërcënimit të Evropës nga Rusia, BE-ja më nuk e ka luksin e “bllokimeve” nga shtetet skeptike.

Kurti në intervistë ka thënë se fitorja e thellë në zgjedhjet e 28 dhjetorit i jep atij përgjegjësi të jashtëzakonshme.

Ai ka thënë se ky mandat është për siguri dhe mbrojtje, por ai tha se dëshiron të investojë edhe në fusha tjera. Përmendi ndërtimin e një stadiumi nacional të futbollit me 8000 ulëse e po ashtu ka folur edhe për fushën e energjisë dhe hekurudhat.

“Po zhvillojmë studim fizibiliteti për një lidhje me gaz me Evropën. Disponojmë rezerva të mëdha të qymyrit, të cilat mbajnë ngarkesën bazë të prodhimit të energjisë. Por, afatgjatë duam të dalim nga qymyri. Gazifikimi është vetëm një zgjidhje kalimtare. Paralelisht po investojmë në energji të ripërtritshme. Përveç kësaj duam edhe të ndërtojmë linja hekurudhore”, tha Kurti. “Hekurudhat janë të gjelbra dhe sigurta. Duam të krijojmë një lidhje hekurudhore mes Aeroportit Ndërkombëtar të Prishtinës dhe kryeqytetit Prishtinës”.

Ai tha se linja hekurudhore mund ta lidhë Kosovën më mirë ndërkombëtarisht.

“Nëse shihni hartën hekurudhore të Evropës, sheh se Kosova na hapësirën e Ballkanit është strukturalisht e lënë anash. Të ashtuquajturit korridoret 8 dhe 10 kalojnë pranë vendit tonë. Por, lidhja veri-jug në Ballkanin Perëndimor, linja hekurudhore 10, mund të na lidhë – veçanërisht në drejtim të Greqisë. Duam të investojmë në mënyrë të synuar”.

Kurti është pyetur edhe për zgjedhjen e presidentit ku tha se për të kërkohen 2/3 e votave dhe duhet dialog. Ai ka thënë se në jetë kurrë “s’ka qenë rebel pa kauza”.

“Gjithmonë kam pasur një qëllim. Sot jam kryeministër me një qëllim”, tha Kurti./ Koha.net