Spiropali nga Prishtina: Kosova prioritet absolut! - Takim i përbashkët i dy qeverive në 2026

Wednesday, 25 February 2026 13:01

• Written by Mexhis

Gjatë një vizite zyrtare në Kosovë, ku zhvilloi takim në Ministrinë e Punëve të Jashtme dhe Diasporës dhe më pas mbajti konferencë të përbashkët për media me homologun e saj Glauk Konjufca, ministrja e Jashtme e Shqipërisë, Elisa Spiropali, paralajmëroi se brenda vitit 2026 do të mbahet një mbledhje e përbashkët e dy qeverive. Sipas saj, në këtë takim do të rishikohen mbi 90 marrëveshjet e nënshkruara deri më tani dhe do të diskutohen fusha të reja bashkëpunimi.

Spiropali theksoi se Kosova është prioritet absolut i politikës së jashtme të Shqipërisë dhe se kjo nuk është retorikë solidariteti, por orientim strategjik shtetëror. Ajo u shpreh se integrimi evropian i Kosovës përbën një test për koherencën e Bashkimit Evropian, kërkoi heqjen e masave të BE-së dhe theksoi se Kosova meriton statusin e vendit kandidat. Lidhur me dialogun me Serbinë, ajo deklaroi se stabiliteti në rajon kërkon pranimin e realitetit të pavarësisë së Kosovës. Spiropali komentoi gjithashtu proceset gjyqësore ndaj ish-krerëve të UÇK-së, duke kërkuar drejtësi të paanshme dhe pa standarde të dyfishta.

Nga ana e tij, ministri i Jashtëm i Kosovës, Glauk Konjufca, e cilësoi bashkëpunimin me Shqipërinë si marrëdhënie vëllazërore, duke theksuar përkushtimin për zbatimin e marrëveshjeve ekzistuese dhe koordinimin për anëtarësimin e Kosovës në Këshillin e Evropës dhe NATO. Vizita e Spiropalit nisi në Prekaz, në kompleksin memorial “Adem Jashari”, ku ajo nënvizoi simbolikën e sakrificës për lirinë e Kosovës.

Spiropali dhe Konjufca vizitë në kullën e familjes Jashari: Dëshmia se liria e Kosovës ka pasur çmim jetën

Wednesday, 25 February 2026 12:43

• Written by Mexhis

Të dy Ministrat u pritën më pas në Kullën e Jasharajve, prej Bacë Rifat Jasharit. Kjo kullë sipas Spiropalit, është dëshmi se liria ka pasur çmim dhe ai çmim është paguar me jetë.

“Këtu ndjen peshën e historisë, por edhe përgjegjësinë e së ardhmes.

Liria nuk është trashëgimi automatike. Ajo kërkon dinjitet, unitet dhe drejtësi çdo ditë.

Prekazi nuk na kërkon lot. Na kërkon që të jemi të denjë”, shkroi Spiropali.

Postimi i Spiropalit:

Ka vende ku fjalët bëhen të vogla.

Sot, bashkë me Zëvendëskryeministrin e Parë dhe Ministrin për Punët e Jashtme dhe Diasporën, Glauk Konjufca, u përulëm në Kompleksin Memorial “Adem Jashari”, aty ku sakrifica e një familjeje u kthye në themel të një shteti.

Në Prekaz nuk përkujtohet vetëm një betejë.

Përkujtohet vendimi për të mos u dorëzuar.

Kulla e Jasharajve, ku u pritëm prej Bacë Rifat Jasharit, nuk është thjesht monument.

Është dëshmi se liria ka pasur çmim – dhe ai çmim është paguar me jetë.

Këtu ndjen peshën e historisë, por edhe përgjegjësinë e së ardhmes.

Liria nuk është trashëgimi automatike. Ajo kërkon dinjitet, unitet dhe drejtësi çdo ditë.

Prekazi nuk na kërkon lot.

Na kërkon të jemi të denjë.

SHBA dhe Greqia shtyjnë gazin e lëngshëm në Ballkan, marrëveshje për korridorin drejt Ukrainës

Wednesday, 25 February 2026 11:52

• Written by Mexhis

Përfaqësues të SHBA-së, Greqisë dhe disa vendeve të Ballkanit e Evropës Lindore ranë dakord në Uashington të shqyrtojnë dhe, kur të jetë e nevojshme, të përshtasin rregulloret dhe tarifat e importit, me qëllim lehtësimin e hyrjes së gazit natyror të lëngshëm (LNG) amerikan në rajon.

Në deklaratën e përbashkët pas takimit theksohet synimi për të forcuar qëndrueshmërinë e tregjeve të gazit, duke shfrytëzuar maksimalisht infrastrukturën ekzistuese dhe duke realizuar investime shtesë aty ku kërkohet për të rritur kapacitetet e dërgesave.

Në bisedime morën pjesë ministra dhe përfaqësues nga Greqia, Bullgaria, Hungaria, Polonia, Rumania, Sllovakia, Moldavia, Ukraina, Kroacia, Lituania, Serbia, Bosnja dhe Hercegovina dhe Shtetet e Bashkuara të Amerikës.

Sipas deklaratës, vendet angazhohen të rrisin transparencën në tregjet e gazit, të harmonizojnë shkëmbimet, të krijojnë korniza tarifore më efikase dhe të reduktojnë ose eliminojnë pengesat rregullatore që mund të frenojnë importet, ndërtimin e infrastrukturës së re dhe stabilitetin afatgjatë të tregtisë së gazit natyror, shkruan Ekathimerini.

Po ashtu, palët u zotuan të mobilizojnë financime publike dhe private, përfshirë agjenci të kreditimit të eksporteve dhe institucione shumëpalëshe financiare, për të garantuar furnizim të sigurt dhe me kosto të përballueshme në Evropën Qendrore dhe Lindore.

Një element kyç i diskutimeve ishte mbështetja e Greqia për korridorin vertikal të gazit, i cili parashikon transportimin e LNG-së amerikane nga porti i Aleksandrupoli, përmes Ballkanit dhe Evropës Lindore, drejt Ukrainës. Megjithatë, një sfidë e mundshme e projektit mbetet niveli i tarifave, veçanërisht duke pasur parasysh se në fazën fillestare do të përdoren tubacione ekzistuese të projektuara për transportin e gazit rus drejt jugut.

Gjykata e Shkupit lë në arrest shtëpie ish-ministrin Artan Grubi

Wednesday, 25 February 2026 11:16

• Written by Mexhis

Gjykata Penale e Shkupit ka vendosur që ish-zëvendëskryeministri Artan Grubi të qëndrojë nën “arrest shtëpiak”, në vend të paraburgimit të mëparshëm, në kuadër të hetimeve për rastin e njohur si “Lotaria Shtetërore”. Ky ndryshim u bë për shkak të shqetësimeve lidhur me sigurinë e tij personale.

Prokuroria Themelore Publike në Shkup, e cila propozoi masën e arrestit shtëpiak, njoftoi se procedurat ndaj Grubit do të vazhdojnë, pasi ai është paraqitur vullnetarisht dhe ka shprehur gatishmëri për bashkëpunim me autoritetet.

Duke qenë se provat janë të shumta, procesi do të vazhdojë edhe në ditët e ardhshme, pas të cilave të dyshuarit do t’i jepet mundësia të japë mbrojtjen e tij.

Autoritetet shpjeguan se vendimi për të zëvendësuar paraburgimin me arrest shtëpiak, duke i konfiskuar pasaportën, u mor duke marrë parasysh faktin që një pjesë e konsiderueshme e provave është siguruar, se Grubi është paraqitur vullnetarisht dhe se siguria e tij në njësinë e paraburgimit nuk mund të garantohej.

Prokuroria shtoi se shqetësimet përfshijnë edhe anëtarët e familjes së tij. Më parë, Grubi u mor në pyetje për rreth 6 orë nga prokurorët.

Artan Grubi, i cili ka mbajtur poste të larta qeveritare, përfshirë zëvendëskryeministrin e parë dhe ministrin për Sistem Politik dhe Marrëdhënie Ndërmjet Bashkësive, u arrestua më herët gjatë ditës në pikën kufitare Bllacë. Pas arrestimit, ai u transferua në njësinë e paraburgimit në Shutkë dhe më pas u dërgua për marrje në pyetje në prokurori.

Ai ishte larguar nga Maqedonia e Veriut në kohën kur filluan procedurat paraprake për “Lotarinë Shtetërore”. Pas largimit të tij, autoritetet vijuan hetimet në mungesë dhe ndërmorën veprime ligjore, duke e përfshirë Grubin në listën e personave të kërkuar./AA