Osmani në Helsinki: Finlanda është ndër zërat më të fortë në mbështetje të Kosovës

Thursday, 24 April 2025 08:13

• Written by /TRT BALKAN

Gjatë një vizite zyrtare në Helsinki, Osmani u takua me kryetarin e Kuvendit të Finlandës, Jussi Halla-ah, si dhe me disa deputetë finlandezë.

Presidentja e Kosovës Vjosa Osmani tha të mërkurën se Parlamenti finlandez dhe deputetët e tij kanë qenë gjithmonë ndër aleatët më të fortë të Kosovës në skenën ndërkombëtare, veçanërisht kur bëhet fjalë për përpjekjet e Prishtinës për t'u bërë anëtare e Këshillit të Evropës dhe organizatave të tjera ndërkombëtare.

Gjatë një vizite zyrtare në Helsinki, Osmani u takua me kryetarin e Kuvendit të Finlandës, Jussi Halla-ah, si dhe me disa deputetë finlandezë.

“Parlamenti i Finlandës dhe deputetët e tij kanë qenë gjithmonë ndër zërat më të fuqishëm të mbështetjes për Kosovën në çdo hap të rrugëtimit tonë”, ka thënë Osmani në një postim në rrjetin social X.

Ajo shtoi se në bisedën e saj me zyrtarët finlandezë, shprehu mirënjohjen e thellë për mbështetjen e palëkundur dhe theksoi rëndësinë e vazhdimit të bashkëpunimit në fushat strategjike.

“Diskutuam për hapat konkretë për forcimin e partneritetit dhe thellimin e bashkëpunimit ndërmjet Kosovës dhe Finlandës”, theksoi ajo.

Kosova ka dorëzuar aplikimin për anëtarësim në Këshillin e Evropës në prill të vitit 2023, ndërsa vendimi për pranimin e aplikimit pritet në vitin 2025. Finlanda, si anëtare e kësaj organizate, në mënyrë aktive po avokon për përfshirjen e Kosovës, përkundër kundërshtimit të disa shteteve anëtare që nuk e njohin pavarësinë e Kosovës.

Bëni kujdes, qytetarët alarmojnë për mesazhe mashtruese në emër të “Raiffeisen Bank”

Wednesday, 23 April 2025 11:57

• Written by /JOQ

Qytetarë të ndryshëm kanë ngritur shqetësimin se po marrin mesazhe të dyshimta në telefonat e tyre, të dërguara nga numra të panjohur. Përmbajtja e këtyre mesazheve pretendon se llogaria e tyre në “Raiffeisen Bank” është çaktivizuar për arsye sigurie, dhe i udhëzon ata që ta riaktivizojnë atë përmes një linku të dërguar.

Për shembull, një nga mesazhet e përhapura shkruan: “Raiffeisen: llogaria juaj është çaktivizuar për arsye sigurie. Ju lutemi riaktivizoni atë nëpërmjet: raiffisen-lidhje.com”.

Nga raportimet e shumta që kanë mbërritur në redaksinë tonë, rezulton se këto mesazhe janë dërguar edhe tek persona që nuk kanë fare llogari në këtë bankë.

Një qytetar ka ndarë përvojën e tij me redaksinë:

“Pershendetje si jeni me erdhi nje mesazh ne telefon nga nje numer qe nuk e njihja ku thoshte: Raiffeisen: llogaria juaj eshte caktivizuar per arsye sigurie, ju lutemi riaktivizoni ate nepermjet: raiffisen-lidhje.com. Un skam hapur asnje llogari ne kete bank dhe kur hapa linkun dukej qart qe ishte nje scam. Per siguri postoje se nuk i dihet ndonje qe nuk merr vesh nga keto e perdor ate link. Gjithashtu opsioni regjistrohu tani nuk funksiononte”.

Gazetarët tanë kontaktuan me operatorë të Raiffeisen Bank, të cilët konfirmuan se këto mesazhe janë të rreme dhe përbëjnë një tentativë mashtrimi. Banka thekson se nuk komunikon asnjëherë me klientët përmes numrave të panjohur apo linqeve të dyshimta, por vetëm përmes kanaleve zyrtare.

Në mungesë të një reagimi nga autoritetet përgjegjëse, JOQ Albania i bën thirrje qytetarëve të jenë të kujdesshëm dhe të mos hapin asnjë link të tillë, në mënyrë që të mbrojnë të dhënat e tyre personale nga abuzimi.

Arrestimi i shefave të rrugores, gazetarja: Ka grup të strukturuar brenda policisë!

Wednesday, 23 April 2025 08:46

• Written by /Argjiroja.net

Gazetarja Klodiana Lala ka zbuluar detaje nga arrestimi i shefave të policisë rrugore. Lala, e ftuar në emisionin ‘Të Paekspozuarit” në MCN TV, u shpreh se është goditur një grup i strukturuar kriminal. Lala thotë se duke u nisur dhe nga ngjarjet si në komisariatin numër 2, shkarkimi i të gjithë zinxhirit, se si gjobiten apo detyrohen biznesmenët për të paguar për lëvizjen e betoniereve në Tiranë, vërteton se ka grup të strukturuar.

“Mendoj se nëse SPAK e ka marrë seriozisht nuk ka goditur policinë rrugore, por një grup të struktuar kriminal që funksionon brenda policisë rrugore. Nesër shefi i qarkullimit rrugor, bashkë me shefin e sektorit të aksidentit, dyshohen sipas SPAK për veprën penale të korrupsionit.

Në Tiranë, gruaja e një biznesmeni u përfshi në një aksident me disa të plagosur. Gruaja duhej të arrestohej. Bashkëshorti ka hyrë në tentativë përmes Edison Tabakut, i kanë kërkuar 2 mijë euro. U dorëzua te zyrtarët e policisë rrugore dhe pas provave dhe përgjimit është brë ndalimi i Roven Zeka dhe dy të tjerët.

Kontaktet direkte kanë qenë mes biznesmenit Ergest Vrioni dhe oficerit të policisë gjyqësore. Pastaj ai del në përgjime që thotë më duhen para për shefat lart.

Besoj fort, nisur dhe nga ngjarjet si në komisariatin numër 2, shkarkimi i të gjithë zinxhirit, se si gjobiten apo detyrohen biznesmenët për të paguar për lëvizjen e betoniereve në Tiranë, më bën të besoj se ka grup të strukturuar, një celulë brenda policisë që veprojnë kështu”- tha Lala

Arrestohen tre të dyshuar për krime lufte kundër popullatës civile në Kosovë

Wednesday, 23 April 2025 08:28

• Written by /AA

Personat e arrestuar “dyshohen për veprën penale ‘Krime lufte kundër popullatës civile’ të kryer gjatë vitit 1998-1999 në Burgun e Prishtinës dhe Lipjanit”, thuhet në njoftimin e Policisë. 

Policia e Kosovës, në koordinim me Prokurorinë Speciale, pas një aktiviteti të gjatë hetimor ka ndërmarrë disa veprime operative, me qëllim të lokalizimit dhe arrestimit të tre të dyshuarve për krime lufte kundër popullatës civile gjatë luftës në Kosovë, transmeton Anadolu.

Siç njofton Policia e Kosovës, fillimisht në qytetin e Lipjanit, në dy lokacione të ndara, janë lokalizuar dhe arrestuar i dyshuari B.T. mashkull dhe e dyshuara N.Č. (femër). Në vazhdimësi të aktivitetit operativ në Prishtinë është lokalizuar dhe arrestuar edhe i dyshuari i tretë M.I., mashkull.

“Të njëjtit dyshohen për veprën penale ‘Krime lufte kundër popullatës civile’ të kryera gjatë vitit 1998-1999 në Burgun e Prishtinës dhe Lipjanit. Në cilësi të gardianëve-zyrtarëve korrektues në burgun e Prishtinës dhe Qendrën Korrektuese në Lipjan, kanë marrë pjesë në maltretimin, rrahjen, torturimin fizik dhe psikik te të ndaluarve shqiptarë”, thuhet në njoftimin e Policisë.

Tutje bëhet e ditur se të arrestuarit janë shoqëruar ne zyrat e Drejtorisë së Hetimit të Krimeve të Luftës dhe janë intervistuar.

Ndërkohë, ndaj arrestimit ka reaguar Lista Serbe, parti politike në Kosovë, e cila tha se për t'i bërë gjërat edhe më keq, arrestimi u krye gjatë periudhës së Pashkëve, duke frikësuar edhe më shumë popullin serb.