Myslimanët janë armiqtë tanë! Dodik frymëzohet me islamofobi pas vizitës ne Izrael

Tuesday, 10 February 2026 20:56

• Written by Mexhis

Lideri i serbëve të Bosnjës, Milorad Dodik, ka ndezur një valë të re tensionesh ndëretnike në Bosnje e Hercegovinë pas zgjedhjeve të së dielës në Republika Srpska, ku kandidati i partisë së tij SNSD, Siniša Karan, u shpall fitues. Fjalimi i Dodikut, i mbajtur menjëherë pas shpalljes së rezultatit, u interpretua gjerësisht si përdorim i fitores elektorale si mandat politik për përshkallëzimin e retorikës nacionaliste dhe për sfidimin e hapur të rendit kushtetues të vendit.

Në deklaratat e tij më të ashpra, Dodik sulmoi drejtpërdrejt Sarajevën dhe komunitetin boshnjak mysliman, duke përdorur një gjuhë të hapur përjashtuese dhe armiqësuese. Ai tha fjalë për fjalë: “Myslimanët dhe Sarajeva myslimane janë armiqtë tanë. Këtë e kanë dëshmuar kudo që kanë mundur.” Në të njëjtën linjë, Dodik e cilësoi kryeqytetin si “shtet armik”, ndërsa shtoi se “Bosnja dhe Hercegovina nuk është shteti ynë”, duke vënë në pikëpyetje vetë legjitimitetin e shtetit të përbashkët dhe duke thelluar më tej ndarjen etnike në diskursin publik.

Fjalimi pas fitores zgjedhore nuk u kufizua vetëm në retorikë politike. Dodik artikuloi edhe kërkesa konkrete institucionale që sfidojnë drejtpërdrejt arkitekturën shtetërore të ndërtuar mbi Marrëveshja e Paqes së Daytonit. Ai kërkoi shfuqizimin e gjyqësorit shtetëror, duke deklaruar: “Gjyqësori duhet të shfuqizohet”, dhe rihodhi idenë e rikthimit të forcave të armatosura të Republika Srpskës, me deklaratën: “Ushtria e Republika Srpskës duhet të ristabilizohet.” Këto qëndrime kanë ringjallur frikën e destabilizimit dhe të militarizimit në një vend që ende mban plagët e thella të luftës së viteve ’90.

Konteksti politik i këtyre deklaratave lidhet ngushtë edhe me vizitën e fundit të Dodikut në Izrael, ku ai u takua me Benjamin Netanyahu. Pas këtij takimi, Dodik e paraqiti veten si një lider që ndan qëndrime të përbashkëta mbi çështjet e “sigurisë” dhe “sovranitetit”, ndërsa, pas kthimit në Bosnje e Hercegovinë, intensifikoi ndjeshëm retorikën kundër Sarajevës dhe myslimanëve. Analistët e shohin këtë sekuencë si një përpjekje për legjitimim ndërkombëtar të agjendës së tij të brendshme, duke përdorur simbolikën dhe kontaktet e jashtme për të forcuar një diskurs të ashpër etnik në planin e brendshëm.

Deklaratat e Dodikut u bënë pas një fushate zgjedhore të polarizuar, gjatë së cilës ai kishte sulmuar vazhdimisht institucionet qendrore dhe kishte vënë në dyshim funksionimin e shtetit të përbashkët. Fitorja e Siniša Karanit u paraqit prej tij si dëshmi se politikat e ndjekura prej vitesh gëzojnë mbështetje popullore dhe si bazë për të shtyrë përpara kërkesa radikale kundër Sarajevës dhe kundër komunitetit mysliman boshnjak.

Reagimet ndaj këtyre deklaratave kanë qenë të menjëhershme dhe të ashpra. Organizata për të drejtat e njeriut, analistë politikë dhe përfaqësues diplomatikë kanë paralajmëruar se etiketimi i myslimanëve si “armiq”, delegjitimimi i Sarajevës dhe thirrjet për shfuqizim institucionesh shtetërore përbëjnë një rrezik serioz për stabilitetin e Bosnje e Hercegovinës dhe minojnë përpjekjet për bashkëjetesë shumëetnike. Kritikat theksojnë se kjo gjuhë bie ndesh me frymën e Daytonit dhe ringjall narrativa që në të kaluarën kanë çuar në konflikt dhe dhunë masive.

Në planin më të gjerë, fjalimi i Dodikut pas fitores zgjedhore, i shoqëruar me referenca ndaj vizitës në Izrael dhe takimit me Netanyahun, shihet si kulmim i një strategjie të qëndrueshme për përshkallëzim politik: përdorimi i rezultatit elektoral për të sfiduar rendin kushtetues, për të sulmuar Sarajevën dhe për të vendosur myslimanët boshnjakë në qendër të një diskursi armiqësor. Kjo qasje ka rihapur frikën se Bosnje e Hercegovina mund të futet sërish në një cikël të rrezikshëm polarizimi politik dhe ndëretnik, me pasoja të paparashikueshme për stabilitetin rajonal.

Mësuesi rrahu nxënësin dhe u arrestua, kolegët e tij në protestë

Tuesday, 10 February 2026 20:41

• Written by Mexhlis

Shoqata Sindikale e Shkollës Fillore dhe të Mesme të Ulët “Pavarësia”, në bashkëpunim me Këshillin Drejtues të Shkollës dhe Këshillin e Prindërve, ka bërë të ditur se sot në 10 shkurt procesi mësimor nuk do të zhvillohet gjatë dy orëve të para. Kjo ndërprerje vjen si pasojë e organizimit të një proteste nga ana e mësuesve.

Sipas një njoftimi të publikuar në rrjetin social Facebook, Shoqata Sindikale ka theksuar se protesta synon të shprehë pakënaqësinë dhe shqetësimin lidhur me sjelljet problematike të disa nxënësve në kuadër të procesit edukativo-arsimor. Në reagim thuhet se raste të shumta të dhunës fizike, fyerjeve, ofendimeve dhe gjuhës denigruese ndaj mësuesve po cenojnë dinjitetin dhe sigurinë e stafit arsimor.

Read more ...

Nesër mblidhet Kuvendi i Kosovës: seanca konstituive hap legjislaturën e re

Tuesday, 10 February 2026 11:53

• Written by Mexhis

Presidentja e Republikës së Kosovës, Vjosa Osmani, ka thirrur seancën konstituive të Kuvendit për legjislaturën e dhjetë të vendit, e cila do të mbahet më 11 shkurt 2026 në orën 12:00. Vendimi për këtë datë u mor pas konsultimeve me shumicën e partive parlamentare të përfaqësuara në Kuvend, duke u bazuar në nevojën urgjente për formimin e institucioneve, miratimin e buxhetit shtetëror dhe ratifikimin e marrëveshjeve ndërkombëtare.

Caktimi i seancës konstituive erdhi një ditë pas certifikimit të rezultateve të zgjedhjeve të 28 dhjetorit 2025 nga Komisioni Qendror i Zgjedhjeve (KQZ), të cilat përcaktuan përbërjen e re të Kuvendit. Në këto zgjedhje, Lëvizja Vetëvendosje fitoi mbi 51 për qind të votave me 57 ulëse, ndërsa Partia Demokratike e Kosovës mori 22 ulëse, Lidhja Demokratike e Kosovës 15, dhe Aleanca për Ardhmërinë e Kosovës 6 ulëse. Ulëset e mbetura prej 20 janë të rezervuara për përfaqësuesit e komuniteteve jo-shumicë.

Sipas njoftimit zyrtar të Presidencës, vendimi për thirrjen e seancës konstituive është marrë “në përputhje me Kushtetutën dhe legjislacionin në fuqi”, duke theksuar rëndësinë e krijimit sa më të shpejtë të institucioneve të reja pas zgjedhjeve parlamentare. Deri më tani, institucioneve të reja u ka munguar formimi që nga mbajtja e zgjedhjeve të 9 shkurtit të vitit të kaluar, duke krijuar një periudhë të zgjatur pa qeveri të plotë funksionale.

Rendi i ditës së seancës konstituive parashikon formimin e Komisionit të Përkohshëm për verifikimin e kuorumit dhe mandateve të deputetëve, betimin e tyre, si dhe zgjedhjen e Kryetarit të Kuvendit dhe nënkryetarëve. Kryesimi i seancës do të bëhet nga deputeti më i vjetër i moshës, me asistencë nga deputeti më i ri. Këto hapa janë përcaktuar në rregulloren e Kuvendit dhe shërbejnë si themel për funksionimin e legjislaturës së re.

Prokuroria speciale kërkoi 180 vite burg për Hashim Thaçin dhe ish-krerët e UÇK-së, Albin Kurti reagon gjerë e gjatë: Po synohet përmbysja e së vërtetës

Monday, 09 February 2026 20:32

• Written by Mexhlis

Lëvizja Vetëvendosje ka reaguar pasi Prokuroria e Hagës kërkoi 180 vite burg të ish-krerëve të UÇK, 45 vite për secilin. Përmes një reagimi publik, LVV thotë se kjo kërkesë e prokurorisë nuk është akt për kërkimin e drejtësisë, por një politikë që synon të përmbysë rendin e së vërtetës. Sipas kësaj force politike, e drejtuar nga kryeministri Albin Kurti, Jugosllavia e Millosheviçit kreu gjenocid në Kosovë dhe UÇK luftoi duke mbrojtur popullin e Kosovës.

Më tej në reagimin e saj, Lëvizja Vetëvendosje thekson se kërkesat për dënime maksimale nuk synojnë drejtësinë, por përbëjnë ndërhyrje politike që zhvendosin përgjegjësinë nga agresori te viktima. Sipas LVV-së, po tentohet të kriminalizohet lufta çlirimtare dhe vetë akti i çlirimit, duke e paraqitur rezistencën ndaj okupimit si krim.

Read more ...