Vjosa Osmani dekoron Përfaqësuesen e Kosovës me Medaljen Presidenciale të Meritave

Wednesday, 01 April 2026 17:52

• Written by Mexhis

Presidentja e Kosovës, Vjosa Osmani, dekoroi më 1 prill 2026 Përfaqësuesen e Kosovës me Medaljen Presidenciale të Meritave për përfaqësim dinjitoz në arenën ndërkombëtare, vetëm një ditë pas humbjes ndaj Turqisë që i mohoi kualifikimin në Botërorin 2026. Në ceremoni morën pjesë, mes të tjerëve, kapiteni Vedat Muriqi, kreu i FFK-së Agim Ademi dhe trajneri Franco Foda. Osmani vlerësoi ekipin për përkushtimin dhe shpirtin garues, duke theksuar se lojtarët kanë ngritur lart flamurin e Kosovës dhe kanë dhënë krenari për gjithë shqiptarët.

Pavarësisht zhgënjimit nga humbja, ku goli i vetëm u shënua nga Kerem Aktürkoğlu në minutën e 53-të në stadiumin Fadil Vokrri, reagime mbështetëse erdhën edhe nga Albin Kurti, i cili theksoi se Kosova është “shumë pranë madhështisë”. Muriqi pranoi se humbja ishte një goditje e rëndë, ndërsa Ademi e cilësoi dekoratën si një vlerësim të çmuar nga shteti. Botërori 2026 do të zhvillohet në SHBA, Kanada dhe Meksikë, ndërsa Kosova mbetet jashtë këtij kompeticioni.

Zgjatet kontrata, Serbia arrin marrëveshje të re për furnizimin me gaz nga Rusia

Tuesday, 31 March 2026 15:17

• Written by Mexhis

Serbia ka arritur marrëveshje për zgjatjen e kontratës ekzistuese për furnizim me gaz nga Rusia, njoftoi presidenti serb, Aleksandar Vuçiç, më 30 mars, duke bërë që Moska të mbetet furnizuesja kryesore e Beogradit me gaz natyror.

Vuçiç njoftoi për këtë çështje pas një bisede telefonike që zhvilloi me presidentin rus, Vladimir Putin.

Marrëveshja e re është për tre muaj dhe, sipas saj, Serbia do të mund të importojë 6 milionë metra kub gaz nga Rusia.

Në një konferencë për media, Vuçiç tha se çmimi i gazit do të jetë ndërmjet 320 dhe 330 dollarë për 1 mijë metra kub. Këto kushte ai i vlerësoi si “shumë të favorshme”, për ç’ka falënderoi Putinin.

Marrëveshja afatshkurtër e arritur në dhjetor skadoi më 31 mars.

Që nga pushtimi rus i Ukrainës, Serbia ka filluar të ulë varësinë nga gazi i Moskës, por ende më shumë se 80 për qind e nevojave për këtë i mbulon nga Rusia.

Kjo varësi nga Rusia, siç vlerëson për Shërbimin e Ballkanit të Radios Evropa e Lirë eksperti hungarez i energjisë Attila Holoda, kushtëzohet si nga faktorë ekonomikë ashtu edhe politikë.

Megjithatë, ai konsideron se në këtë moment faktori ekonomik mbetet më i drejtpërdrejtë.

“Gazi rus për një kohë të gjatë i është furnizuar Serbisë me kushte relativisht të favorshme, ndërsa infrastruktura ekzistuese dhe marrëdhëniet tregtare e bëjnë këtë opsion më të lehtë në afat të shkurtër”, theksoi ai.

Në të njëjtën kohë, sipas Holodas, e rëndësishme është edhe dimensioni politik, në të cilin Beogradi përpiqet të ruajë marrëdhënie stabile me Moskën, duke balancuar qartë në raport me rrugën e tij drejt BE-së.

Bashkimi Evropian po përpiqet të zvogëlojë të ardhurat e Rusisë nga energjia që i përdorpër luftën në Ukrainë dhe planifikon që deri më 1 janar 2028 të ndalojë plotësisht importin e naftës dhe gazit rus.

Ndërprerja graduale e importit të gazit rus në territorin e BE-së ka nisur në fillim të vitit dhe nuk vlen për tranzitin e gazit rus drejt vendeve të treta.

Megjithatë, BE-ja pret nga Serbia, si vend kandidat për anëtarësim, që të harmonizohet gradualisht me të gjitha vendimet.

Serbia është i vetmi vend kandidat për anëtarësim në BE në Ballkanin Perëndimor që nuk ka vendosur sanksione ndaj Rusisë për shkak të pushtimit të Ukrainës.

Serbia tashmë blen gaz edhe nga Azerbajxhani, përmes Bullgarisë, ndërsa ndërtimi i gazsjellësit drejt Maqedonisë së Veriut, që do të mundësonte qasje në gaz natyror të lëngshëm nga Greqia, pritet të nisë këtë vit./ REL

BBC: Ëndrra e Kosovës në "Fadil Vokrri" - 90 minuta larg Botërorit të Amerikës!

Tuesday, 31 March 2026 12:01

• Written by Mexhis

Kombëtarja e Kosovës është vetëm një hap larg një arritjeje historike, pasi sot në mbrëmje do të përballet me Turqinë në ndeshjen vendimtare të “play-off”-it për kualifikimin në Kupën e Botës. Sipas një analize të BBC, një fitore në stadiumin “Fadil Vokrri” në Prishtinë do t’i siguronte Kosovës pjesëmarrjen e parë në një Botëror, vetëm 10 vite pas pranimit në FIFA dhe UEFA.

Skuadra e drejtuar nga Franco Foda vjen në këtë ndeshje pas një rruge mbresëlënëse, duke përmbysur pritshmëritë pas një starti të dobët në grup. Pas humbjes 4-0 ndaj Zvicrës, Kosova mbeti e pamposhtur në pesë ndeshje, duke siguruar rezultate të forta ndaj Suedisë dhe Sllovenisë, si dhe duke eliminuar Sllovakinë në gjysmëfinale.

Megjithëse Turqia renditet shumë më lart në klasifikimin botëror dhe konsiderohet favorite, faktori fushë dhe entuziazmi i tifozëve pritet të luajnë rol kyç për Kosovën. Ndeshja pritet të zhvillohet në një atmosferë elektrizuese në Prishtinë, ku interesimi është shumë më i madh se kapaciteti i stadiumit.

Një kualifikim i mundshëm do të kishte jo vetëm rëndësi sportive, por edhe simbolike për Kosovën, duke u konsideruar si një nga momentet më të mëdha në historinë e saj moderne pas çlirimit dhe shpalljes së pavarësisë. Për shumë analistë, ky sukses do të kishte jehonë ndërkombëtare dhe do të forconte identitetin dhe imazhin e shtetit në arenën globale.

Presidenti i Kroacisë anulon Samitin Brdo-Brijon, shkak bëhet Aleksandër Vuçiç

Tuesday, 31 March 2026 10:49

• Written by Mexhis

Presidenti i Kroacisë, Zoran Milanoviç ka anuluar samitin e shefave të shteteve të Ballkanit Perëndimor me Kroacinë dhe Slloveninë. Ky Samit ishte njoftuar se do të organizohej në muajin maj në ishullin kroat Brijoni.

Presidenti Milanoviç si arsyetim për anulimin e samitin e ka përmendur mosekzistimin e kushteve që në atë takim të ftohet edhe presidenti i Serbisë, Aleksandër Vuçiç, për shkak të deklaratave të tij kohëve të fundit.

“Prononcimet politike dhe veprimet e ditëve dhe javëve fundit të presidentit të Serbisë Aleksandçr Vuçiç janë në kundërshtim të plotë me qëllimet e Procesit Brdo-Brijoni, ato i dëmtojnë raportet ndërshtetërore dhe rrezikojnë paqen dhe stabilitetin në rajonin e Evropës Juglindore. Presidenti Milanoviç është i mendimit se në rrethanat e tilla nuk ekzistojnë kushtet dhe nuk është e mundshme ardhja e presidentit të Serbisë, Aleksandër Vuçiq në Kroaci”, citon “Jutarnji list” njoftimin nga zyra e Presidentit të Republikës së Kroacisë.

Samiti i fundit Brdo-Brijon ishte zhvilluar në vjeshtë të vitit të kaluar në Tiranë, ku kishin marrë pjesë të gjithë presidentët e vendeve të rajonit, përfshirë edhe presidentin e Serbisë Vuçiç.