Joseph: Problemi kryesor i Ballkanit është ndarja që ekziston në Evropë rreth Kosovës!

Sunday, 12 April 2026 21:15

• Written by Mexhis

Edward Joseph, profesor në Universitetin John Hopkins, ka theksuar rëndësinë e sigurisë në Ballkanin Perëndimor duke thënë se, kur rajoni s’është i sigurt, as ‘’Evropa s’është e sigurt’’.

Joseph, në intervistën e dhënë për “Danas“, ka vlerësuar se, paqëndrueshmëria në këtë rajon, në masë të madhe rrjedh nga çështja e pazgjidhur nga ndarjet që janë brenda Evropës për këtë Kosovën, dhe për ‘’mënyrën se si mund të adresohet’’ kjo çështje.

‘’Unë, së bashku me bashkautorët, shkrova raportin “Nga kriza në konvergjencë”, i cili paraqet një teori gjithëpërfshirëse të paqëndrueshmërisë së vazhdueshme në Ballkan. Sipas mendimit tim, i gjithë problemi qëndron në ndarjet në Evropë rreth Kosovës. Arsyetimi – dhe mënyra se si mund të adresohet – është përshkruar shkurt në përmbledhjen ekzekutive’’, ka deklaruar ai.

Ai ka folur edhe për dialogun mes Kosovës dhe Serbisë, ku ka thënë se ky proces ‘’mund të zgjidhë ende probleme dhe kriza të vështira’’.

‘’ Do të flas shumë saktë për rrugën përpara. Së pari, dialogu mund të zgjidhë ende probleme dhe kriza të vështira, siç e kemi parë së fundmi me lëvizjen rreth Ligjit për të Huajt. Së dyti, zgjidhja e vërtetë qëndron në riorientimin strategjik të Beogradit. Po, siç u përmend, Kurti është një partner shumë i vështirë – siç shihet në heqjen dorë nga modeli i suksesshëm i votimit dhe lëvizje të tjera të pakoordinuara. Por le të kujtojmë paraardhësin e tij Avdullah Hoti. Edhe unë e njoh atë dhe ai ishte krejt e kundërta e Kurtit në çdo mënyrë. E megjithatë, Beogradi e minoi në mënyrë të dukshme Kryeministrin Hoti me provokime të hapura menjëherë pas Marrëveshjes së Uashingtonit në vitin 2020. Prandaj, mund të jemi të qartë në lidhje me dialogun: për sa kohë që Beogradi i përmbahet një “balance” imagjinare dhe refuzon të përcaktojë qartë rrugën drejt BE-së, nuk mund të presim ndonjë përparim me Kosovën. Dhe kjo krizë e zgjatur është në dëm të qytetarëve serbë në Kosovë. Përsëri, siç e thashë, rruga drejt NATO-s për Serbinë dhe Kosovën i jep fund të gjitha këtyre’’, ka deklaruar Joseph mes tjerash.

Kurti në Londër: Takime kyçe me Britaninë dhe sinjale të forta për sigurinë ndaj Serbisë e Rusisë

Saturday, 11 April 2026 20:12

• Written by Mexhis

Kryeministri i Kosovës, Albin Kurti, ka zhvilluar një vizitë zyrtare në Londër, ku ka zhvilluar një sërë takimesh të rëndësishme politike, ekonomike dhe të sigurisë, duke theksuar forcimin e marrëdhënieve me Mbretërinë e Bashkuar.

Gjatë qëndrimit, Kurti u takua me Yvette Cooper, duke vlerësuar mbështetjen e vazhdueshme britanike dhe duke e cilësuar Britaninë si partner strategjik për Kosovën. Ai zhvilloi gjithashtu takim me Odile Renaud-Basso, ku u diskutua mbështetja financiare për zhvillimin ekonomik dhe projektet infrastrukturore.

Në fokus të vizitës ishte edhe pjesëmarrja në konferenca dhe panele ndërkombëtare në Londër, ku Kurti diskutoi për sfidat globale të sigurisë, shtetndërtimin ekonomik dhe integrimin evropian të Kosovës. Në një intervistë gjatë vizitës, ai ngriti shqetësimet për kërcënimet e sigurisë që, sipas tij, vijnë nga Serbia dhe Rusia.

Vizita u mbyll me takime dhe diskutime me figura të njohura akademike dhe politike, duke konfirmuar angazhimin e Kosovës për të forcuar pozicionin ndërkombëtar dhe bashkëpunimin me aleatët perëndimorë.

Eurodeputeti: Kosova ndër liderët për anëtarësim në BE, por po bllokohet politikisht

Saturday, 11 April 2026 20:12

• Written by Mexhis

Eurodeputeti austriak Thomas Waitz ka vlerësuar se Kosova ka bërë përparim të dukshëm në ndërtimin e institucioneve demokratike dhe në proceset zgjedhore, duke theksuar se vendi mund të konsiderohej ndër kandidatët kryesorë për anëtarësim në Bashkimin Evropian.

Ai ka deklaruar se Kushtetuta e Kosovës është në përputhje të lartë me standardet evropiane.

“Kosova është një vend që ka një kushtetutë shumë të afërt me kushtetutat evropiane. Është një vend që ka dhënë shembull se si organizohen zgjedhjet në rajon, dhe edhe aty ku ka pasur dyshime, janë bërë rinumërime të rregullta. Disa vende të rajonit mund të mësojnë nga ky shembull”, ka thënë Waitz.

Duke folur për luftën kundër korrupsionit, Waitz theksoi se Kosova është në rrugë të mirë, por procesi mbetet sfidues.

“Kosova është në një rrugë të mirë sa i përket luftës kundër korrupsionit. Megjithatë, kjo është një betejë e vazhdueshme, siç ndodh edhe në të gjitha shtetet tona anëtare”, u shpreh ai.

Sipas eurodeputetit, nëse Kosova do të trajtohej si një aplikante e zakonshme për anëtarësim në BE, ajo do të renditej ndër vendet më të avancuara.

“Nëse Kosova do të ishte një aplikante e zakonshme për Bashkimin Evropian, do të ishte ndër vendet kryesuese. Ende ka reforma për t’u bërë dhe përmirësime për t’u parë, por vendi do të ishte në një pozitë të mirë”, deklaroi Waitz.

Megjithatë, ai theksoi se procesi i integrimit po pengohet nga faktorë politikë dhe mungesa e njohjes nga Serbia.

“Arsyeja pse nuk është kështu lidhet me faktin se Kosova ende nuk njihet nga Serbia dhe vazhdon të bllokohet në rrugën e saj. Kjo është një çështje ku pajtohem me kolegët, sepse elita politike nuk është e gatshme për kompromis”, tha ai.

Në fund, Waitz shtoi se rezultatet e zgjedhjeve në Kosovë duhet të respektohen.

“Ka pasur dy palë zgjedhje që kanë treguar një fitues të qartë dhe kjo duhet të pranohet”, përfundoi ai.

Ndër mbështetësit më të fortë të Kosovës, ndahet nga jeta ish-kongresmeni amerikan Eliot Engel

Saturday, 11 April 2026 10:10

• Written by Mexhis

Eliot Engel, ish-kongresmeni i Nju Jorkut nga Bronxi, ka ndërruar jetë të premten, njoftoi familja e tij në një deklaratë. Ai ishte 79 vjeç.

Demokrati përfaqësoi Bronxin gjatë 16 mandateve në Dhomën e Përfaqësuesve nga viti 1989 deri në vitin 2021.

Engel ka qenë i pranishëm në seancën solemne të shpalljes së Pavarësisë së Kosovës më 17 shkurt 2008.

Ka qenë ndër figurat më mbështetëse për Kosovën në Kongres. Në një shkrim të vitit 2023, ai pati bërë thirrje që SHBA-ja të qëndronte me Kosovën, duke vlerësuar se nuk po ka trajtim të duhur të mosmarrëveshjeve Kosovë-Serbi.

Engel e pati cilësuar ndërhyrjen e NATO-s në Kosovë si suksesin më të madh të politikës së jashtme për Perëndimin.

Familja e Eliot tha se ai ndërroi jetë në paqe, i rrethuar nga familjarët “në lagjen që e rriti: Bronxin.”

“Gjatë më shumë se 44 viteve në shërbim publik, Eliot Engel luftoi pa u lodhur për zgjedhësit e tij në vend dhe për paqen dhe sigurinë në mbarë botën,” thuhet në deklaratën e familjes. “Ne e duam dhe na mungon shumë.”

Engel u zgjodh për herë të parë në Kongres në vitin 1988. Ai u mposht në zgjedhjet paraprake demokrate të vitit 2020 nga Jamaal Bowman, fituesi i mëvonshëm i zgjedhjeve të përgjithshme të atij viti.

Në vitet e fundit të mandatit të tij, Engel shërbeu si anëtar me peshë dhe kryetar i Komisionit të Dhomës së Përfaqësuesve për Marrëdhëniet me Jashtë.

“Gjatë gjithë karrierës së tij, kongresmeni Engel ishte një mbrojtës i fortë i zgjedhësve të tij në Westchester dhe Bronx. Ai ishte një kampion i të drejtave të njeriut dhe … ndihmoi në formësimin e politikës së SHBA-së në skenën globale,” tha në një deklaratë drejtuesi ekzekutiv i Westchester County, Ken Jenkins. “Trashëgimia e tij është ajo e përkushtimit, bindjes dhe shërbimit.”

Engel ishte anëtar i Asamblesë së Shtetit të Nju Jorkut për më shumë se 10 vjet para se të bëhej kongresmen, skruan CBS.