Pasagjeri kapet me 1 milion paund cash në aeroportin e Heathrow
Një 48-vjeçar u ndalua nga oficerët e Forcës Kufitare në Aeroportin Heathrow të Mbretërisë së Bashkuar, teksa po udhëtonte drejt Bejrutit, pasi gjatë kontrollit, në valixhet e tij u gjetën 1 milion paund kesh.
Mazen Al Shaar u arrestua menjëherë dhe u paraqit në Gjykatën e Magjistraturës në Uxbridge të hënën, ku iu refuzua lirimi me kusht. Ai do të dalë përsëri në gjykatë më 17 prill në Isleworth për një seancë paraprake.
Andy Noyes, komandant i Agjencisë Kombëtare të Krimit (NCA), tha: “Shumë nga kërcënimet e krimit të organizuar në Mbretërinë e Bashkuar lidhen me dëshirën për para. Ky zbulim prej 1 milion paund është rezultat i punës së shkëlqyer të oficerëve të Forcës Kufitare.”
Një zëdhënës i Ministrisë së Brendshme shtoi se kapja e kësaj shume parash tregon përkushtimin e Forcës Kufitare për të mbrojtur kufijtë dhe sigurinë publike.
Ndërkohë, raste të ngjashme janë regjistruar edhe në vende të tjera. Në shkurt, autoritetet në Aeroportin e Bejrutit arrestuan një pasagjer nga Turqia me 1.4 milionë dollarë kesh. Po ashtu, në 2023 një grup që kontrabandonte 100 milionë paund në Dubai u dënua në Mbretërinë e Bashkuar. /A2 Televizion
