Ngrihet aktakuzë kundër një burri për përdhosjen e Kuranit në Prizren

Thursday, 22 May 2025 08:45

• Written by /Euronews.al

Prokuroria Speciale e Kosovës ka ngritur aktakuzë të martën kundër një të dyshuari, i cili akuzohet për nxitje të përçarjes për shkak se kishte përdhosur librin e shenjtë të myslimanëve, Kuranin, muaj më parë.

Në një njoftim për media, prokuroria e identifikoi të dyshuarin vetëm me inicialet I.P. dhe tha se ai e kishte grisur Kuranin në fillim të marsit të këtij viti afër teqes “Saraçhane” në qytetin jugor të Kosovës, Prizren.

“Hetimet kanë rezultuar se I.P. e ka grisur dhe e ka shpërndarë në tokë librin e shenjtë të myslimanëve, Kuranin, duke shkaktuar mllef të madh te komuniteti islam dhe duke cenuar bashkëjetesën ndërmjet grupeve me ideologji të ndryshme fetare”, thuhet në njoftim.

Ai akuzohet formalisht për nxitje të përçarjes dhe mosdurimit, sipas nenit 141, paragrafi 1 të Kodit Penal të Kosovës.

Vepra penale e nxitjes së përçarjes dhe mosdurimit është e dënueshme me gjobë dhe burgim me kohëzgjatje deri në pesë vjet, sipas Kodit Penal.

Por, prokurorët kanë kërkuar nga gjykata të urdhërojë tretman të detyrueshëm psikiatrik në liri për të dyshuarin.

Prokurorët e kërkuan këtë masë të detyrueshëm psikiatrik “meqenëse aftësia e tij, në kohën e kryerjes së veprës penale, për të gjykuar dhe kontrolluar veprimet e veta, ka qenë e zvogëluar në shkallë esenciale”.

Banka Botërore: Shqipëria me cilësinë më të ulët të arsimit të lartë

Thursday, 22 May 2025 08:28

• Written by /JOQ

Shqipëria renditet ndër vendet me cilësinë më të dobët të arsimit të lartë në rajonin e Europës dhe Azisë Qendrore, sipas një raporti të fundit të Bankës Botërore, duke ngritur shqetësime serioze për të ardhmen akademike dhe ekonomike të vendit.

Sipas raportit, mungesa e financimeve, kurrikulat e vjetruara, ndikimi i politikës dhe interesave private, si dhe mungesa e lidhjes me tregun e punës, janë ndër faktorët kryesorë që po e minojnë rëndë sistemin universitar në Shqipëri.

Banka Botërore thekson gjithashtu se universitetet shqiptare po përgatisin studentë të papërgatitur për realitetin e tregut të punës, për shkak të infrastrukturës së dobët dhe mungesës së kërkimit shkencor, duke thelluar hendekun me vendet më të zhvilluara.

Një tjetër shqetësim i ngritur është rënia e përparimit ndërbrezor, ku fëmijët e sotëm kanë më pak gjasa të jenë më të arsimuar se prindërit e tyre – një tregues i qartë regresi në arsim.

Nëse nuk merren masa urgjente, Shqipëria rrezikon të mos arrijë statusin e një shteti me të ardhura të larta në një apo dy breza, paralajmëron Banka Botërore.

Përveç Shqipërisë, të njëjtat probleme janë konstatuar edhe në vende të tjera si Maqedonia e Veriut, Bosnja dhe Hercegovina, Armenia dhe Azerbajxhani.

Raporti kërkon ndërhyrje të thella përmes reformave në financim, depolitizim, modernizim të kurrikulave dhe investime serioze në infrastrukturë dhe kërkime, në mënyrë që arsimi i lartë të shndërrohet në një shtyllë zhvillimi dhe jo pengesë për të ardhmen e vendit.

Duhet thënë se një ndër problemet kryesore me të cilat përballet arsimi i lartë dhe studentët ditët e sotme është edhe korrupsioni i stafeve akademike për qëllime personale e fitime. Në shumë raste studentët janë të detyruar të paguajnë pedagogët për të marrë provimet, ndërkohë që stafi i bordit akademik përfshihet shpeshherë në tendera korruptive, kujtojmë Universitetin Bujqësor të Tiranës, i përfshirë edhe rektori.

Netanyahu pretendon se është i përkushtuar ndaj "vizionit të Trumpit" për përfundimin e sulmeve në Gaza

Wednesday, 21 May 2025 13:35

• Written by /AA

Lidhur me paralajmërimet për sulmet gjithëpërfshirëse të nisura për pushtimin e përhershëm të Rripit të Gazës, kryeministri izraelit Benjamin Netanyahu pretendon se është i përkushtuar ndaj "vizionit për Gazën" të presidentit të SHBA-së Donald Trump, transmeton Anadolu.

Në një deklaratë nga Zyra e Kryeministrit thuhet se Netanyahu reagoi ndaj Britanisë së Madhe, Francës dhe Kanadasë, të cilat bënë thirrje që t'u jepet fund sulmeve gjithëpërfshirëse të nisura për të pushtuar përgjithmonë Rripin e Gazës.

"Izraeli e pranon vizionin e presidentit Trump dhe u bën thirrje të gjithë udhëheqësve evropianë të bëjnë të njëjtën gjë. Sulmet mund të përfundojnë nesër nëse lirohen pengjet në Gaza, nëse Hamasi dorëzon armët, nëse udhëheqësit e tij dëbohen dhe nëse në Gaza nuk mbetet asnjë element i armatosur", thuhet në deklaratë.

Në deklaratë vendet në fjalë kanë reaguar se janë të gatshme të njohin shtetin e Palestinës ndërsa pretendohet se sulmet e dhunshme të kryera nga Izraeli në Gaza që nga 7 tetori 2023 janë një "luftë mbrojtëse".

Britania, Franca dhe Kanadaja i bënë thirrje Izraelit të ndalojë menjëherë sulmet ndaj Gazës. "Ne do të ndërmarrim hapa më konkretë kundër Izraelit nëse nuk ndalon operacionet e reja ushtarake dhe nuk heq pengesat që ka vendosur për ndihmën humanitare", thuhet në reagimin e këtyre vendeve.

Ushtria izraelite ka filluar zbatimin e një plani sulmi që do të zgjerojë dhe do ta bëjë të përhershëm pushtimin e Rripit të Gazës. Netanyahu tha se Izraeli do të pushtojnë të gjithë Rripin e Gazës.

Sipas planit, ushtria izraelite do ta pushtojë përgjithmonë Rripin e Gazës ndërsa palestinezët do të dëbohen në "kampe përqendrimi" në jug të Gazës. Izraeli do t'u japë palestinezëve këtu ndihmë të mjaftueshme humanitare "aq sa për të mbijetuar".

Senati italian miraton dekretin për Gjadrin: Ndryshon pakti Rama-Meloni, Shqipëria bëhet me CPR

Wednesday, 21 May 2025 08:25

• Written by /Ora News

Senati italian ka miratuar dekretin e Qeverisë së Giorgia Melonit për të ndryshuar mënyrën e funksionimit të kampit të refugjatëve në Gjadër. Dekreti është shndërruar në ligj me 90 vota pro, 56 kundër dhe një abstenim.

Dekreti në fjalë lejon përdorimin e qendrave të hapura në Shqipëri për refugjatëve që janë në pritje të riatdhesimit, të njohura ndryshe si CPR.

Pra, tashmë Gjadri do të shndërrohet në një kamp për transferimin e refugjatëve të destinuar për dëbim nga Italia, duke mos qenë vetëm për refugjatët në pritje të procesit për azil.

Sipas marrëveshjes, kampet e Gjadrit dhe Shëngjinit do të përdoreshin për refugjatët afrikanë të shpëtuar në ujërat ndërkombëtare, por pas refuzimit të gjykatave italiane qeveria Meloni u detyrua të ndryshojë objektin.

Në fillim u tha se në vendin tonë do të vinin vetëm gra dhe persona të parrezikshëm, por tani aty po mbahen kriminelë të dënuar për vepra të rënda dhe që nuk kanë përfituar dot azilin. Qeveria shqiptare nuk ka bërë ende asnjë koment për këtë ndryshim të njëanshëm të marrëveshjes.