Thaçi para verdiktit: Kosova ishte më e rëndësishme se fati im personal!
Në Dhomat e Specializuara të Kosovës në Hagë po zhvillohet seanca e fundit para shpalljes së vendimit për ish-krerët e Ushtria Çlirimtare e Kosovës. Katër drejtuesit e dikurshëm të UÇK-së po paraqesin sot deklaratat e tyre përfundimtare përpara trupit gjykues, në një moment vendimtar të procesit.
Ish-presidenti i Kosovës, Hashim Thaçi, e nisi fjalën e tij me një mesazh urimi për shqiptarët me rastin e përvjetorit të shpalljes së pavarësisë, përpara se të artikulonte mbrojtjen e tij përfundimtare.
“Për gati tri vite në këtë sallë ju keni dëgjuar akuzat e prokurorisë. Ju keni dëgjuar edhe të vërtetën. Është vetëm një e vërtetë. Unë jam plotësisht i pafajshëm.”
Thaçi theksoi se në fillim të vitit 1998, kur ndodhën masakrat në Kosovë, ai ishte student në Cyrih dhe nuk kishte plane për pushtet.
“Në kohën e masakrave në fillimit të vitit 1998, isha student në Cyrih. Unë nuk po bëja plane si ta marr kontrollin e Kosovës, i vetmi njeri i cili po bënte plane ishte Sllobodan Millosheviçi.”
Ai u shpreh se vendimi për t’u kthyer në Kosovë ishte i motivuar nga reagimi ndaj dhunës dhe jo nga ambicie politike.
“Duke i parë masakrat në vendim tim nuk mund të qëndroja indiferent, vendosa të vi në Kosovë. Për këtë jam krenar dhe nuk i bëhem pishman asnjëherë. Është ofendim për kujtimin e heronjve dhe mijëra viktimave. Është ofendim dhe për përpjekjet e NATO-s me të cilët bashkëpunuam ngushtë.”
Sipas tij, kundërshtari i vetëm në atë periudhë ishte presidenti i atëhershëm serb, Slobodan Millosheviç.
“Unë nuk isha i sigurt nëse do të shihja familjen time e lërë më të ushtrojë kontroll. Unë u ktheva në atdhe për të rrezikuar jetën time për liri”, deklaroi Thaçi, duke shtuar se kontrolli real në atë kohë ishte “në duart e hekurta të Sllobodan Millosheviçit.”
