Osmani: Prania e trupave amerikane garanton stabilitet në Kosovë

Monday, 02 March 2026 10:50

• Written by Mexhis

Presidentja Vjosa Osmani ka marrë pjesë në ceremoninë e ndërrimit të komandës dhe pranim-dorëzimit të detyrës së komandantit të Komandës Rajonale-Lindje të KFOR-it, ku ka ritheksuar mirënjohjen për mbështetjen e Shteteve të Bashkuara të Amerikës dhe rëndësinë e pranisë së trupave amerikane në Kosovë.

Osmani ka theksuar se Kosova do të mbetet gjithmonë mirënjohëse ndaj Shteteve të Bashkuara të Amerikës, për mbështetjen e palëkundur në të gjitha etapat e shtetndërtimit dhe forcimit të paqes e sigurisë në vend, shkruan RTK.

Sipas njoftimit të Presidencës, Osmani e ka uruar kolonelin Sargeant për detyrën e re, duke e siguruar për mbështetjen e plotë të institucioneve të Kosovës në përmbushjen e mandatit të tij dhe të misionit të KFOR-it të udhëhequr nga NATO.

“Ajo theksoi gjithashtu rëndësinë e jashtëzakonshme të pranisë së trupave ushtarake amerikane në Kosovë, të cilat, sipas saj, “jo vetëm që garantojnë stabilitet dhe siguri afatgjatë, por edhe dërgojnë një mesazh të qartë përkushtimi ndaj paqes dhe sigurisë në gjithë rajonin”, përfundon njoftimi.

BE pritet të heqë sot të gjitha masat ndëshkuese ndaj Kosovës

Monday, 02 March 2026 10:19

• Written by Mexhis

Bashkimi Evropian pritet që sot të heqë të gjitha masat ndëshkuese ndaj Kosovës, të vendosura para më shumë se dy vite e gjysmë.

Vendimi është marrë nga organet përkatëse të Komisionit Evropian dhe pritet të miratohet edhe nga vendet anëtare në takimin e Grupit Punues për Ballkanin Perëndimor (COWEB), që zhvillohet të hënën në Bruksel.

Heqjen e masave e kishte paralajmëruar më herët presidentja e Komisionit Evropian, Ursula von der Leyen, pas një takimi me liderët e rajonit, përfshirë presidenten Vjosa Osmani. Në atë kohë ishte njoftuar se masat do të hiqeshin “në pjesën e hershme të vitit 2026”.

Në fund të vitit të kaluar, Komisioni Evropian kishte zhbllokuar rreth 50% të asistencës financiare, në vlerë prej afro 216 milionë eurosh. Me vendimin e ri pritet të lirohen edhe 205 milionë euro të tjera nga Programet e Paraanëtarësimit dhe nga Fondi i Investimeve për Ballkanin Perëndimor, duke përmbyllur heqjen e plotë të masave.

Masat ishin vendosur në qershor 2023 si reagim ndaj veprimeve të autoriteteve të Kosovës, të cilat BE-ja dhe partnerë si Shtetet e Bashkuara të Amerikës dhe Republika e Shqipërisë i cilësuan si “të njëanshme dhe të pakoordinuara”, që rrisnin tensionet në veri të vendit.

Fillimisht, disa shtete anëtare i konsideruan masat si të kufizuara, por më pas u konstatua se ato përfshinin rreth gjysmë miliardi euro fonde të bllokuara nga programet e ndryshme evropiane.

Përveç pezullimit të fondeve, BE-ja kishte kufizuar edhe takimet në nivel të lartë me përfaqësuesit e qeverisë së Kosovës, me përjashtim të atyre që lidhen me dialogun dhe çështjet e sigurisë në veri.

Burime nga Komisioni Evropian bëjnë të ditur se mes 11 dhe 13 marsit Kosovën pritet ta vizitojë komisionerja për Zgjerim, Marta Kos. Gjatë 14 muajve të mandatit të saj, ajo nuk e kishte vizituar më parë Kosovën, ndërsa kishte qëndruar në të gjitha vendet e tjera të rajonit. Si arsye ishte përmendur mungesa e një qeverie me legjitimitet të plotë gjatë vitit 2025.

Me vendimin e ri pritet të hiqen jo vetëm masat financiare, por edhe të gjitha kufizimet e tjera politike ndaj Kosovës.

Vjosa Osmani mbështet operacionin ushtarak amerikan kundër Iranit: Ka ardhur ora e lirisë!

Saturday, 28 February 2026 15:45

• Written by Mexhis

Presidentja e Kosovës, Vjosa Osmani, ka thënë të shtunën se mbështet sulmet e Shteteve të Bashkuara kundër Iranit, duke shkruar në platformën X se “ka ardhur ora e lirisë për popullin e Iranit”, falë udhëheqjes së SHBA-së dhe presidentit amerikan, Donald Trump.

Osmani ka thënë se Republika e Kosovës, si gjithmonë, qëndron e palëkundur përkrah Shteteve të Bashkuara dhe aleatëve të saj në mbrojtje të lirisë, paqes, sigurisë dhe stabilitetit.

Osmani i ka dënuar sulmet e regjimit iranian kundër aleatëve në Lindjen e Mesme, duke shtuar se Kosova do të vazhdojë t’i mbështesë veprimet e ndërmarra nga Shtetet e Bashkuara dhe aleatët e tjerë për t’i dhënë fund regjimit iranian dhe për t’i dhënë një shans përfundimtar lirisë dhe paqes.

BE përplaset për Serbinë: Në tryezë pezullimi i fondeve pas ligjeve për gjyqësorin

Saturday, 28 February 2026 15:35

• Written by Mexhis

Më 25 shkurt, me nismën e Gjermanisë, ambasadorët e vendeve anëtare të Bashkimit Evropian zhvilluan një diskutim urgjent mbi zhvillimet e fundit në Serbi, pas miratimit të ligjeve të reja për gjyqësorin, të cilat Komisioni Evropian i cilësoi si një hap prapa në fushën e sundimit të ligjit.

Debati nuk prodhoi vendime konkrete, por disa shtete kërkuan që të shqyrtohet mundësia e pezullimit të fondeve nga Plani i Rritjes për Serbinë, në rast se ligjet e kontestuara mbeten në fuqi. Në të njëjtën kohë, një pjesë e vendeve anëtare vlerësuan deklarimin e Beogradit se nuk do ta zbatojë ligjin deri në publikimin e opinionit të Komisionit të Venecias, i cili pritet në qershor.

Sipas burimeve diplomatike, disa vende – mes tyre shtete skandinave, baltike dhe Holanda – shprehën shqetësim të thellë, duke theksuar se ndryshimet në sistemin gjyqësor përbëjnë një regres në një nga shtyllat kryesore të procesit të integrimit evropian. Disa prej tyre i kërkuan Komisionit Evropian të marrë në konsideratë ngrirjen e pagesave nga Plani i Rritjes nëse rekomandimet e Komisionit të Venecias nuk respektohen.

Në diskutim u përmend edhe retorika në rritje anti-BE në Serbi, si dhe qëndrimi i Beogradit për të abstenuar në votimin e rezolutës për Ukrainën në Asamblenë e Përgjithshme të OKB-së, çështje që shtuan rezervat e disa kryeqyteteve evropiane.

Nga ana tjetër, një grup shtetesh – përfshirë Francën, Italinë, Hungarinë dhe Sllovakinë – mbështetën një qasje më të kujdesshme, duke argumentuar se një pezullim i menjëhershëm i fondeve do të dëmtonte perspektivën strategjike të afrimit të Serbisë me BE-në. Këto vende rikujtuan se edhe në dhjetor 2025 kishin mbështetur rikthimin në tryezë të hapjes së Grupit 3 në negociatat e anëtarësimit, duke u bazuar në parimin e meritës dhe në vlerësimin teknik të Komisionit Evropian se Serbia kishte përmbushur kushtet e nevojshme.

Burimet diplomatike bëjnë të ditur se disa shtete anëtare theksuan gjithashtu se kritikat ndaj ligjeve për gjyqësorin do të kishin më shumë peshë nëse BE-ja do të pranonte edhe përparimet e arritura nga Serbia në fusha të tjera.

Diskutime të ngjashme janë zhvilluar disa herë gjatë muajit shkurt në kuadër të Grupit të Punës për Zgjerimin dhe Vendet Kandidate (COELA), ku janë analizuar pasojat e mundshme të këtyre ndryshimeve ligjore.

Komisionerja për Zgjerimin, Marta Kos, ka deklaruar se Komisioni Evropian do të vlerësojë nëse Serbia ka përmbushur kushtet paraprake për disbursimin e fondeve nga Plani i Rritjes. Sipas rregullave në fuqi, këto kushte përfshijnë funksionimin e sistemit demokratik, respektimin e sundimit të ligjit dhe, në rastin e Serbisë dhe Kosovës, angazhimin konstruktiv në dialog.