Kuvendi i Kosovës përkujton Epopën e UÇK: “Nga Prekazi nisi orteku i lirisë”

Thursday, 05 March 2026 13:55

• Written by Mexhis

Në përkujtim të 28-vjetorit të Epopesë së Ushtrisë Çlirimtare të Kosovës (UÇK), Kuvendi i Kosovës mbajti një seancë solemne ku folën presidentja Vjosa Osmani, kryeministri Albin Kurti, kryetarja e Kuvendit Albulena Haxhiu dhe përfaqësues të partive parlamentare.

Presidentja Osmani theksoi se Epopeja e marsit nuk është vetëm një kujtesë emocionale, por një moment themelues për shtetin e Kosovës. “Nga Prekazi nisi orteku i lirisë që nuk u ndal më. Epopeja është epike sepse buroi nga populli”, u shpreh ajo, duke kujtuar sakrificën e familjes Adem Jashari, e cila sipas saj u shndërrua në simbol të përhershëm të lirisë.

Kryetarja e Kuvendit, Haxhiu, tha se Epopeja është një mesazh i përjetshëm se sakrifica për liri mund të ndryshojë rrjedhën e historisë. “Në tri ditë luftime, historia e Kosovës kaloi përmes qëndresës së familjes Jashari, të cilët zgjodhën të mos largoheshin nga toka e tyre”, deklaroi ajo.

Kryeministri Kurti e cilësoi 5 marsin një ditë reflektimi për rrugën e bërë dhe për sfidat që e presin Kosovën. “Toka e Prekazit u bë altar i lirisë dhe një familje u bë simbol kombëtar. Liria është vlerë që nuk negociohet”, tha ai.

Edhe krerët e partive opozitare nderuan sakrificën e familjes Jashari. Kryetari i Partia Demokratike e Kosovës, Bedri Hamza, tha se ato tri ditë në Prekaz janë një mësim i përhershëm për kuptimin e lirisë, ndërsa kreu i Lidhja Demokratike e Kosovës, Lumir Abdixhiku, theksoi se sakrifica e familjes Jashari mbetet amanet për brezat që ta duan dhe ta mbrojnë vendin.

Më 5, 6 dhe 7 mars 1998, forcat serbe sulmuan familjen e komandantit të UÇK-së, Adem Jashari, në Prekaz të Skenderajt. Gjatë tri ditëve të luftimeve u vranë Jashari, 22 anëtarë të familjes së tij dhe 33 të afërm e bashkëluftëtarë, një ngjarje që u shndërrua në simbol të rezistencës dhe luftës për lirinë e Kosovës.

Vulin kërcënon hapur Kosovën: “Duhet të veprojmë si Mossadi kundër armiqve!”

Thursday, 05 March 2026 12:11

• Written by Mexhis

Kryetari i Lëvizjes Socialiste në Serbi, Aleksandar Vulin, ish-shef i BIA-s, ka kërcënuar Kosovën dhe kryeministrin Albin Kurti. Ai deklaroi në një emision në mediat serbe se Serbia dhe BIA duhet të veprojnë në Kosovë njësoj siç, sipas tij, Izraeli dhe Mossadi veprojnë ndaj atyre që janë kundër interesave të tyre.

“Shteti serb duhet të veprojë. Unë, pas kësaj, do të kërkoja nga shërbimet tona të krijojnë një plan të qartë se si do të merremi me individë me emër e mbiemër, të cilët janë bartës të politikave antiserbe, e ata le të mendojnë se çfarë do t’u ndodhë. Mundet Izraeli, mundet Mossadi, pse s’mundet shërbimi serb, pse s’mundemi ne?”, ka thënë Vulin.

Se Serbia ka kryer sulme kundër shqiptarëve, këtë ai nuk e ka mohuar. Përkundrazi, Vulin ka deklaruar se dinë ta bëjnë këtë “punë” mirë. Ai ka kërcënuar edhe kryeministrin Kurti dhe secilin që ndjek politika antiserbe.

“Nuk është se kurrë nuk kemi bërë gjëra të tilla; e dimë si bëhen ato. Askush nuk na ka frikën. Kurti nuk e ka aspak problem t’u ikë marrëveshjeve, sepse nuk frikësohet se do të ketë pasoja, as ai e as të tijtë”, ka thënë ai.

Sipas Vulinit, Serbia duhet të ndërhyjë në mënyrë që Kosova t’ia ketë frikën Serbisë. Aktualisht, Vulin ka shërbyer në qeverinë e Serbisë si drejtor i Zyrës për Kosovën nga viti 2012, ministër pa portofol për Kosovën, shef i BIA-s dhe, së fundmi, zëvendëskryeministër i Serbisë.

Kurti paralajmëron: Pasdite rifillojnë përpjekjet për presidentin

Thursday, 05 March 2026 11:59

• Written by Mexhis

Kryeministri i Kosovës, Albin Kurti ka thënë se sot pasdite do t’i vazhdojnë përpjekjet për të zgjedhur presidentin.

Ai duke hyrë në ndërtesën e Kuvendit pas mbledhjes solemne të Qeverisë për nder të Epopesë së UÇK-së ka thënë se urojnë e shpresojnë që të ketë edhe një kandidatë të dytë në garën për president.

“Pasdite do t’i vazhdojmë përpjekjet për ta zgjedhur presidentin. Urojmë e besojmë e shpresojmë edhe për një kandidaturë të dytë në mënyrë që ta përmbushim kërkesën kushtetuese për garë”, ka thënë ai.

Sot është dita e fundit për mbajtjen e seancës për zgjedhjen e presidentit të ri të Kosovës.

Të mërkurën u raportua për mbajtjen e një seance, por që ajo nuk u thirr në mungesë të plotësimit të kushtit që të jenë dy kandidatë në garë për kryetar të shtetit.

Kryetarja e Kuvendit të Kosovës, Albulena Haxhiu, në një paraqitje publike mbrëmjen e së mërkurës ka thënë se zv.kryeministri dhe ministri i Punëve të Jashtme, Glauk Konjufca është i vetmi kandidat i propozuar me nënshkrimet e 30 deputetëve të Lëvizjes Vetëvendosje (LVV) dhe të grupit multietnik

Por që sipas saj seanca nuk mund të mbahet me vetëm një kandidat./ Koha.net

Presidenca e gatshme t’i dërgojë në Kuvend amendamentet kushtetuese për zgjedhje të presidentit nga populli

Thursday, 05 March 2026 11:43

• Written by Mexhis

Shefja e stafit të presidentes Vjosa Osmani, Learta Hollaj, ka thënë se janë të gatshëm që nesër t’i dërgojnë për votim në Kuvend amendamentet kushtetuese që parashohin zgjedhjen e presidentit nga populli.

Ajo ka thënë se Osmani hyn në këtë garë vetëm për t’u rizgjedhur, por meqë sipas saj po flitet për garë, atëherë ajo ka thënë se gara e vërtetë është ajo te populli.

“Për të hyrë në këtë garë presidentja Osmani hyn për t’u rizgjedhur, e nëse flasim për garë, atëherë garë për garë po kthehemi aty ku gara është e vërtetë, është te qytetarët e Republikës së Kosovës, ne kemi kohë, janë edhe 24 orë afat, dhe ne jemi të gatshëm që në ora 8 në mëngjes që të dorëzojmë amendamentet në Kushtetuese dhe të kthehemi te sovrani, ku është problemi, matemi dhe pastaj kuptojmë se cila është përgjigja”, është shprehur Hollaj në “Interaktiv” të KTV-së./ Koha,net