Ushtria i.zraelite njoftoi se ka filluar një ofensivë të re në shkallë të gjerë në Rripin e Gazës
Trump: Katari do të blejë pajisje ushtarake nga SHBA-ja me vlerë 42 miliardë dollarë
Presidenti amerikan Donald Trump tha se Katari do të blejë pajisje ushtarake nga SHBA-ja me vlerë 42 miliardë dollarë dhe se ata synojnë të mbledhin 10 trilionë dollarë investime në mandatin e tij të dytë, transmeton Anadolu.
Në fjalimin në bazën amerikane Al-Udeid në Katar, të cilën e vizitoi si pjesë e turneut të tij në Lindjen e Mesme, Trump tha se kishin arritur marrëveshje me Katarin për të blerë sistemin mbrojtës nga raketat balistike THAAD, avionët e furnizimit ajër-ajër "Pegasus" dhe mjetet ajrore pa pilot të tipit "MQ-9B Skyguardian" nga SHBA-ja me vlerë prej 42 miliardë dollarësh.
Trump, i cili tha se do të investonin 10 miliardë dollarë për të zgjeruar bazën amerikane Al-Udeid, potencoi se ata po bashkëpunojnë me administratën e Dohas në mbrojtje.
"Siç e kam thënë edhe më parë, do të miratoj një buxhet të paprecedentë prej 1 trilion dollarësh për Forcat e Armatosura të SHBA-së", tha Trump.
Ai shtoi se synojnë të mbledhin 10 trilionë dollarë investime gjatë mandatit të dytë të presidencës së tij. Trump thotë se buxheti i mbrojtjes i vendit të tij do të rritet në këtë mënyrë.
Gjermania bën thirrje për hapa urgjente për të shmangur urinë në Gaza
Gjermania ka bërë thirrje për hapa urgjente për të parandaluar një uri akute në Gaza mes bllokadës së vazhdueshme të Izraelit ndaj shpërndarjes së ndihmës humanitare për palestinezët, transmeton Anadolu.
Kancelari gjerman, Friedrich Merz, gjatë fjalës së tij në parlament tha se qeveria e tij mbetet një mbrojtëse e fortë e sigurisë së Izraelit dhe operacioneve izraelite kundër Hamasit, por gjithashtu theksoi nevojën për të ofruar më shumë ndihmë humanitare për palestinezët.
“Ne presim që ata të ofrojnë ndihmë më të mirë humanitare për popullsinë në Gaza, vuajtjet e të cilëve i shohim, veçanërisht ato të fëmijëve, grave dhe të moshuarve”, tha Merz.
“Sot morëm lajme se një uri akute mund ta kërcënojë Gazën. Është një detyrim humanitar i të gjithë të përfshirëve dhe e theksoj i të gjithë të përfshirëve, që uria në rajon të shmanget sa më parë”, theksoi ai.
Huthit shënjestrojnë aeroportin izraelit "Ben Gurion" me raketë hipersonike
Huthit e mbështetur nga Irani në Jemen njoftuan se kanë shënjestruar aeroportin "Ben Gurion" në kryeqytetin izraelit Tel Aviv me një raketë hipersonike për herë të tretë në 24 orët e fundit.
Në një deklaratë me shkrim nga Forcat e Armatosura të Jemenit të lidhura me Huthit thuhet se është shënjestruar aeroporti "Ben Gurion" i Izraelit."Forcat tona raketore kanë kryer një operacion të kualifikuar ushtarak duke synuar aeroportin 'Ben Gurion' me raketë hipersonike për herë të tretë në 24 orët e fundit", thuhet në deklaratë.
Bin Selman: Gjatë vizitës së Trumpit u nënshkruan marrëveshje me vlerë mbi 300 miliardë dollarë
Princi i Kurorës i Arabisë Saudite, Mohammed bin Salman, njoftoi sot se mbretëria ka nënshkruar marrëveshje me SHBA-në me vlerë më shumë se 300 miliardë dollarë gjatë vizitës së presidentit të SHBA-së, Donald Trump. Komentet e tij erdhën gjatë Forumit Saudito-Amerikan të Investimeve 2025 në Riad, ku mori pjesë edhe Trump, pas bisedimeve dypalëshe dhe nënshkrimit të disa marrëveshjeve. “Vendet tona ndajnë një marrëdhënie të thellë ekonomike që filloi 92 vjet më parë”, tha princi i kurorës, duke theksuar se investimet e përbashkëta janë një nga shtyllat kryesore të lidhjeve ekonomike të vendit të tij me SHBA-në.