Trump zbulon arsyen e anulimit të udhëtimit të delegacionit amerikan në Pakistan
Presidenti Donald Trump tha të shtunën se Irani “ofroi shumë, por jo mjaftueshëm”, pasi njoftoi se nuk do të dërgonte më një delegacion në Pakistan për një raund tjetër bisedimesh këtë fundjavë që synonin një marrëveshje.
Presidenti amerikan, Donald Trump përsëriti kohën e gjatë të udhëtimit si një arsye kryesore për anulimin e udhëtimit të planifikuar të të dërguarit të posaçëm Steve Witkoff dhe Jared Kushner në Pakistan për një raund të dytë bisedimesh me iranianët. Sipas tij këto negociata mund të zhvillohen nëpërmjet telefonit.
Ai gjithashtu pretendoi se mori një ofertë më të mirë nga Irani vetëm pak minuta pas anulimit.
“Ata na dhanë një dokument që duhej të kishte qenë më i mirë, dhe çuditërisht, menjëherë, kur e anulova, brenda 10 minutash, morëm një dokument të ri që ishte shumë më i mirë”, u tha Trump gazetarëve në Air Force One.
Kur u pyet nga gazetarët për më shumë detaje mbi atë që u ofrua, Trump tha se ata ofruan shumë, por jo mjaftueshëm.
Më herët sot, Trump anuloi një udhëtim të planifikuar të Steve Witkoff dhe Jared Kushner në Islamabad.
Ai theksoi se nuk ia vlen që delegacioni amerikan të bëjë fluturimin 18-orësh për në Pakistan kur SHBA-të kanë të gjitha kartat në konfliktin me Iranin. Ai shtoi se iranianët mund të telefonojnë SHBA-në në çdo kohë që duan.
