Përmendej 2 mijë herë në dosjet Epstein, gjendet i vdekur rekrutuesi i modeleve
Daniel Siad, rekrutuesi 69-vjeçar i modeleve i lidhur me Jeffrey Epstein, është gjetur i vdekur në banesën e tij në Colombes, pranë Parisit. Prokuroria e Nanterre ka urdhëruar kryerjen e autopsisë për të përcaktuar shkakun përfundimtar të vdekjes. Avokatja e tij deklaroi se Siad pësoi arrest kardiak, por kjo mbetet për t’u konfirmuar zyrtarisht.
Emri i Siadit shfaqet rreth 2.000 herë në dokumentet e publikuara nga Departamenti amerikan i Drejtësisë për çështjen Epstein. Dosjet përmbajnë komunikime ku ai i dërgonte financierit amerikan fotografi dhe informacione për gra të reja, ndërsa pagesat e dokumentuara mes tyre arrinin në dhjetëra mijëra dollarë.
Pak përpara vdekjes, Siad kishte pranuar se i kishte prezantuar gra Epsteinit, por pretendonte se nuk kishte dijeni për abuzimet e dyshuara dhe se marrëdhënia e tyre kishte qenë vetëm profesionale. Ai këmbëngulte se i kishte besuar pohimit të Epsteinit se, pas dënimit të vitit 2008, nuk do të kryente më vepra të tilla.
Siad ishte denoncuar në Francë nga disa gra për përdhunim dhe trafikim qeniesh njerëzore, akuza që ai i mohonte. Sipas avokates, ndaj tij nuk ishte ngritur ende zyrtarisht akuzë penale. Vdekja e tij ndodh ndërsa autoritetet franceze po hetojnë më gjerësisht lidhjet e rrjetit Epstein me industrinë evropiane të modës.