Besim pa përçarje, politikë me dinjitet dhe moral: Osman Musliu kandidon për Kuvendin e Kosovës
Osman Musliu është një nga figurat që ka tërhequr më shumë vëmendje në fushatën për zgjedhjet e 7 qershorit në Kosovë, jo për shkak të një karriere të gjatë partiake, por për shkak të profilit të tij si hoxhë dhe imam me ndikim në komunitetin e Drenicës por dhe më gjerë në krejt audiencën dhe opinionin publik shqiptar. Ai vjen nga një rrugëtim publik i ndërtuar kryesisht përmes shërbimit fetar, ligjërimit në xhami dhe marrëdhënies së drejtpërdrejtë me besimtarët.
Rasti i tij u bëri jehonë pasi ai dha dorëheqjen nga detyra e imamit për të hyrë në garën politike. Në xhumanë e fundit si imam, Musliu u paraqit si një figurë që nuk dëshironte ta kthente xhaminë në hapësirë ndarjeje politike. Ky moment i dha kandidimit të tij një ngarkesë simbolike: largimi nga minberi për të kërkuar një rol në Kuvend.
Në deklarimet e tij publike, ai është përpjekur ta paraqesë hyrjen në politikë si vazhdim të shërbimit ndaj njerëzve. Ka theksuar se nuk vjen nga “karriera”, por nga “shërbimi”, dhe se nuk do ta përdorë besimin, kombin apo ndjenjat e qytetarëve si mjet për vota.
Në planin publik, Musliu përfaqëson një figurë që hyn në politikë me kapital të fortë moral dhe fetar. Ai garon në listën e Lëvizjes Vetëvendosje.