Ministria e Jashtme e Iranit: Izraeli mund të minojë bisedimet në vazhdim
Zëdhënësi i Ministrisë së Jashtme të Iranit ka deklaruar se aktualisht nuk ka plan për një vizitë zyrtare në Pakistan ose që ndërmjetësuesit pakistanezë të vizitojnë Teheranin.
Lidhur me negociatat e vazhdueshme SHBA-Iran dhe telefonatën e fundit Trump-Netanyahu, Esmail Baghaei theksoi se Izraeli mund t’i minojë bisedimet.
“Entitetet sioniste po bëjnë çmos për të minuar marrëveshjen dhe ne presim disa veprime nga Izraeli”, tha ai.
“Asgjë nuk përjashtohet megjithatë, ato vende që bëjnë thirrje për luftë dhe armiqësi, përfshirë entitetet sioniste, ndihen gjerësisht në media dhe mund të kenë ndikim te zyrtarët amerikanë”, shtoi ai.
Presidenti amerikan, Donald Trump tha se ka udhëzuar negociatorët të mos nxitoheshin për një marrëveshje, pasi më parë kishte sugjeruar se një e tillë ishte afër arritjes së saj.
Trump tha në rrjetet sociale të shtunën se pati një bisedë shumë të mire me udhëheqësit e Arabisë Saudite, Emirateve të Bashkuara Arabe, Katarit dhe të tjerëve në lidhje me një “Memorandum Mirëkuptimi që lidhet me PAQEN”.
“Një marrëveshje është negociuar kryesisht, e cila i nënshtrohet finalizimit midis Shteteve të Bashkuara të Amerikës, Republikës Islamike të Iranit dhe vendeve të tjera të listuara”, tha Trump.
Presidenti nuk dha detaje të mëtejshme mbi marrëveshjen, por ka këmbëngulur se çdo marrëveshje do ta pengonte absolutisht Iranin të pajiset me armë bërthamore.
Të dielën, ai tha në Truth Social: “Të dyja palët duhet të marrin kohën e tyre dhe ta bëjnë siç duhet. Nuk mund të ketë gabime!”