Netanyahu rikthehet në gjykatë, rifillon procesi për korrupsion në prag të zgjedhjeve në Izrael
Kryeministri izraelit Benjamin Netanyahu është paraqitur të mërkurën në Gjykatën e Qarkut në Jerusalem, ndërsa ka rifilluar gjyqi i tij i gjatë për korrupsion. Në seancën e fundit dëshmoi ministri Ze’ev Elkin, emri i të cilit përmendet disa herë në dosjen e njohur si “Rasti 2000”, ku Netanyahu akuzohet për mashtrim dhe shkelje të besimit.
Procesi pritet të vazhdojë deri më 20 korrik, përpara pushimeve verore të sistemit gjyqësor. Seancat do të rifillojnë në fillim të shtatorit dhe më pas pritet të zhvillohen me një ritëm më intensiv.
Netanyahu përballet me akuza për ryshfet, mashtrim dhe shkelje të besimit në tri çështje të ndryshme, të njohura si Rastet 1000, 2000 dhe 4000.
“Rasti 1000” lidhet me akuzat se Netanyahu dhe familja e tij kanë marrë dhurata të shtrenjta nga biznesmenë në këmbim të favoreve politike. “Rasti 2000” lidhet me dyshimet për negociata me botuesin e gazetës “Yedioth Ahronoth” për mbulim më të favorshëm mediatik, ndërsa “Rasti 4000” përfshin pretendimet se kryeministri izraelit ka ofruar përfitime rregullatore në këmbim të një mbulimi pozitiv nga media.
Gjyqi ndaj Netanyahut ka nisur në vitin 2020. Ai i ka mohuar vazhdimisht akuzat dhe i ka cilësuar ato si pjesë të një fushate të motivuar politikisht për ta larguar nga pushteti.
Rifillimi i procesit gjyqësor vjen në një moment të rëndësishëm politik për Izraelin, i cili pritet të mbajë zgjedhjet e përgjithshme më 27 tetor, ndërsa Netanyahu synon të sigurojë një mandat tjetër në krye të qeverisë.