Xi i drejtohet Erdoganit: Vendet tona të mëdha kanë shpirt pavarësie
Kina dhe Turqia janë “vende të mëdha në zhvillim me një shpirt pavarësie”, dhe zhvillimi i marrëdhënieve bilaterale në një nivel të lartë i shërben interesave themelore të të dy vendeve, si dhe interesave të përbashkëta të vendeve të Jugut global.
Kështu tha presidenti kinez Xi Jinping gjatë takimit me homologun turk Recep Tayyip Erdogan, i cili erdhi në qytetin e Tianjin për të marrë pjesë në samitin e Organizatës për Bashkëpunim të Shangait (SCO).
Sipas agjencisë së lajmeve “Xinhua”, kreu i shtetit kinez e ftoi Erdoganin që të përfitohet nga tendenca globale për paqe, zhvillim dhe bashkëpunim të dobishëm për të gjithë, duke punuar së bashku për një sistem më të drejtë dhe të barabartë të qeverisjes ndërkombëtare.
Në prag të përvjetorit të 55-të të marrëdhënieve diplomatike mes dy vendeve, që do të shënohet vitin e ardhshëm, Xi shprehu shpresën për forcimin e besimit politik reciprok, mbështetjen në çështjet me interes të rëndësishëm dhe bashkëpunimin në siguri dhe luftën kundër terrorizmit./klantv