Grupi t.errorist PKK njofton tërheqjen e plotë nga Turqia
Një moment kyç në nismën e Ankarasë “Türkiye pa terrorizëm” është shënuar të dielën, pasi grupi terrorist PKK ka njoftuar se ka filluar t'i tërheqë të gjitha forcat e tij nga Türkiye drejt Irakut verior. Grupi terrorist PKK, në një deklaratë të lexuar në rajonin e Kandilit në pjesën veriore të provincës Sulaimani të Irakut, tha se po zbaton tërheqjen e të gjitha forcave të tij nga territori i Türkiyes. Në deklaratë thuhet se vendimi për t’i dhënë fund pranisë dhe aktiviteteve të armatosura të organizatës terroriste është marrë në maj, nën udhëzimet e udhëheqësit të saj të burgosur, Abdullah Öcalan.
Një grup prej 23 terroristësh të PKK-së, të cilët raportohet se kishin mbërritur nga Türkiye, ishin të pranishëm në vendin e shpalljes së këtij vendimi.
Në korrik, një grup anëtarësh të PKK-së shkatërruan pjesën e parë të armëve të tyre, veprim që Türkiye e përshkroi si “një pikë kthese të pakthyeshme”.
Ky grup, i shpallur organizatë terroriste nga Türkiye, ShBA-ja dhe BE-ja, ka zhvilluar një fushatë terroriste që prej viteve 1980, duke shkaktuar dhjetëra mijëra viktima.
Zëvendëskryetari i Partisë për Drejtësi dhe Zhvillim (AK Parti), Efkan Ala, tha se njoftimet dhe masat e fundit përbëjnë “një fazë tjetër të rëndësishme të kapërcyer në eliminimin e terrorizmit.”
“Me çrrënjosjen e plotë të terrorizmit, i cili për një kohë të gjatë ka qenë një prangë në këmbët e kombit tonë, do të hapen dyert e një epoke të re,” deklaroi ai.
Zëdhënësi i AK Partisë, Omer Çelik, tha se çarmatimi dhe shpërbërja e strukturave të armatosura të PKK-së në Türkiye, Irak dhe Siri janë rezultate konkrete të nismës “Türkiye pa terrorizëm.”
Ai e përshkroi këtë nismë si “një hap strategjik dhe historik për mbrojtjen e demokracisë sonë nga të gjitha kërcënimet,” duke shtuar se ajo përfaqëson “një qëndrim kundër përpjekjeve për të imponuar ndikim imperial në rajon përmes organizatave terroriste.”
Çelik theksoi se procesi, i mbështetur nga “udhëheqja e fortë shtetërore” e presidentit Recep Tayyip Erdoğan dhe i udhëhequr nga Komisioni Parlamentar për Solidaritet Kombëtar, Vëllazëri dhe Demokraci, “vazhdon të japë rezultate pozitive.”
Ai shtoi se Türkiye mbetet e kujdesshme ndaj çdo përpjekjeje për të provokuar paqëndrueshmëri në rajon, përfshirë veprimet politike, të inteligjencës dhe operative që synojnë ta pengojnë procesin./trt
