Erdogan takon ministrin e jashtëm iranian, ja çfarë deklaroi presidenti turk
Presidenti i Turqisë, Recep Tayyip Erdogan, ka shprehur shqetësimin e tij për tensionet e fundit ndërmjet Iranit dhe Izraelit, duke theksuar se rifillimi i bisedimeve bërthamore me Shtetet e Bashkuara është e vetmja mënyrë për të zgjidhur këtë konflikt dhe mosmarrëveshjen mbi programin bërthamor të Iranit. Këtë deklaratë ai e bëri gjatë një takimi me ministrin e jashtëm të Iranit, Abbas Araqchi, në Stamboll. Në fjalimin e tij, Erdogan shprehu gatishmërinë e Turqisë për të luajtur një rol lehtësues në rifillimin e bisedimeve bërthamore midis Teheranit dhe Uashingtonit. Ai vuri në dukje se negociatat mund të ofrojnë një mundësi për të ulur tensionet dhe për të arritur një marrëveshje të qëndrueshme.
Për më tepër, Erdogan akuzoi Izraelin për akt sabotimi pas sulmeve ndaj Iranit, duke theksuar se ato ndodhin pikërisht para rifillimit të bisedimeve bërthamore me Shtetet e Bashkuara, duke minuar mundësitë për një zgjidhje paqësore.
“Vendimi i Izraelit për të sulmuar Iranin para fillimit të bisedimeve bërthamore ishte një akt sabotimi,” tha Erdogan, duke shtuar se këto veprime e komplikojnë më tej situatën në rajon dhe rrisin pasigurinë globale.
Kjo deklaratë vjen në një moment të tensionuar, kur marrëdhëniet ndërmjet Iranit dhe Izraelit janë përkeqësuar, ndërsa bisedimet bërthamore ndërmjet Iranit dhe SHBA-së janë ndërprerë prej kohësh./euronews