Britania e Madhe dhe Franca në bisedime për njohjen e Palestinës
Mbretëria e Bashkuar është në bisedime me Francën dhe Arabinë Saudite për mundësinë e njohjes së një shteti palestinez, përpara një konference të thirrur nga këto dy shtete në qershor, për të mbajtur gjallë rrugën e një zgjidhjeje me dy shtete në Lindjen e Mesme, tha sekretari i jashtëm britanik, David Lammy. Ky është hera e parë që Mbretëria e Bashkuar pranon publikisht se është duke diskutuar me Francën për një proces të mundshëm njohjeje të Palestinës, në kuadër të një iniciative diplomatike të mbështetur nga të dy vendet.
Kjo konferencë mund të jetë një mundësi e rëndësishme për të ndihmuar në rivitalizimin e një zgjidhjeje të qëndrueshme për konfliktin izraelito-palestinez.
Njohja e shtetit palestinez nga dy anëtarë të përhershëm të Këshillit të Sigurimit të OKB-së, siç janë Britania dhe Franca, do të përbënte një deklaratë të fuqishme në politikën ndërkombëtare. Megjithatë, kjo do të ndeshë në shumë pengesa diplomatike, përfshirë nevojën për të sqaruar se çfarë po propozon Franca dhe nëse njohja mund të bëhet pjesë e një procesi të besueshëm për arritjen e një zgjidhjeje me dy shtete – një ide që Izraeli e kundërshton fuqishëm.
Gjatë një deklarate para Komitetit të Marrëdhënieve Ndërkombëtare të Dhomës së Lordëve, Lammy tha se Mbretëria e Bashkuar është e angazhuar të ndërmarrë hapin e njohjes të Palestinës vetëm kur të ketë ndikim të vërtetë në terren dhe jo vetëm për qëllime simbolike. Ai theksoi gjithashtu se njohja e Palestinës nga disa shtete evropiane në vitet e fundit nuk ka pasur efektin e dëshiruar dhe se kjo është një pasqyrë e trishtueshme e realitetit politik./euronews