Rihapet Llotaria Amerikane - Ja rregulla e reja të vendosura nga DASH
Departamenti i Shtetit i SHBA publikoi rregulloren përfundimtare në Regjistrin Federal, nën titullin “Vizat: Përmirësimi i Verifikimit dhe Luftimi i Mashtrimit në Programin e Vizave të Emigrantëve të Diversitetit”. Rregulli i ri do të hyjë në fuqi më 10 prill 2026.
Sipas ndryshimeve, çdo aplikant duhet të paraqesë të dhëna të detajuara nga pasaporta gjatë plotësimit të formularit elektronik të regjistrimit. Përveç kësaj, kërkohet edhe ngarkimi i një skanimi të faqeve biografike dhe të nënshkrimit të pasaportës.
Qëllimi i këtyre masave është forcimi i verifikimit të identitetit dhe reduktimi i mashtrimeve, aplikimeve të dyfishta apo regjistrimeve nga palë të treta pa dijeninë e individëve.
Çdo vit, deri në 55,000 viza emigrantësh jepen përmes një përzgjedhjeje të rastësishme të kompjuterizuar. Sipas Departamentit të Shtetit, kërkesa për dokumentacionin e pasaportës do të sigurojë që pjesëmarrja në Lotari të lidhet me persona realë dhe do të kufizojë ndërhyrjen e agjentëve të paligjshëm.
Të dhënat e kërkuara përfshijnë numrin e pasaportës, vendin ose autoritetin që e ka lëshuar, datën e skadimit, si dhe kopjen e skanuar të faqeve kryesore. Regjistrimet që nuk plotësojnë këto kritere rrezikojnë të skualifikohen, ndërsa përjashtime të kufizuara parashikohen për persona pa shtetësi ose ata që nuk mund të pajisen me pasaportë për arsye zyrtare.
Rregullorja përfshin gjithashtu ndryshime teknike në terminologji, duke zëvendësuar “gjininë” me “seks” dhe “moshën” me “datën e lindjes”, me synim rritjen e saktësisë në mbledhjen e të dhënave.
Këto ndryshime do të zbatohen duke filluar me Lotarinë DV të vitit 2027, ndërsa aplikantët duhet të sigurohen që pasaporta e tyre të jetë e vlefshme dhe e gatshme gjatë procesit të aplikimit.