Acarohet konflikti Berisha-Salianji, akuza për mendësi vrasjeje dhe “birësim” te PS
Konflikti mes Sali Berishës dhe Ervin Salianjit ka kulmuar me akuza të forta mes të dyve, një ditë pas protestës së opozitës. Shkak është bërë një histori që ka treguar Sali Berisha për kohën kur Salianji ishte në burg, por që të lirohej disa muaj më herët i kishin kërkuar të firmosë një deklaratë se nuk do të bënte përpjekje për vrasjen e Fatmir Xhafajt. Berisha tregoi se Salianji i kishte ardhur në zyrë nga burgu dhe i kishte kërkuar një këshillë duke u shprehur se tashmë Salianji është “birësuar” nga mazhoranca.
“E birësuan. Iku, mori fund. Unë ç’është e vërteta kam shumë kënaqësi të kem rivalë dhe në të gjitha kohërat unë kam pasur rivalë. Por kur tjetri birësohet, bën zgjedhjen e tij. Politikisht e kam fjalën. E ka bërë, nuk kam ç’i bëj unë. Për dijeni, meqë jemi këtu. Një ditë më vjen nga burgu në zyrë, se mirë është meqenëse e hapëm bisedën, dhe më thotë, erdha të të marr një mendim.
Çfarë mendimi, i them unë. Urdhëro, e prita mirë. Sigurisht, kemi bërë gjithçka për ta cilësuar të burgosur politik dhe e ka merituar plotësisht. Çfarë mendimi? Tani, thotë, më kanë ngelur tre muaj burg. Për të dalë më takon të dal sipas ligjit, por kërkojnë një deklaratë në të cilën duhet të garantoj se nuk do vras Fatmir Xhafën.
Kush ta kërkon këtë? Ma kërkon gjykata dhe drejtoria e burgut.
I them unë, po ti je i burgosur politik. Nuk ke punë me Fatmir Xhafën, nuk je zënë, nuk je sharë, nuk je rrahur me Fatmir Xhafën.
Meqë më pyet mua, unë të këshilloj që një deklaratë të tillë të mos e bësh se ti merr fajësinë në këtë mes. Të thuash që unë nuk kam ndërmend të vras Fatmir Xhafën, do të thotë se Fatmir Xhafa të burgosi ty se e ke kërcënuar. Kjo është e vërteta. Natyrisht, ai ishte në burg dhe unë nuk mund të merrja përsipër më shumë se kaq. Këshilla ime është që ju të mos e firmosni se kjo të fajëson dhe ti je i ri në karrierë dhe ke karrierë përpara. Mirë, tha. Iku. Doli, erdhi. Çfarë bëre me atë? Jo, tha, nuk ma kërkuan më. Tani, të tjerat lexojini vetë”u shpreh Berisha.
Por këtë histori Salianji e ka konsideruar një shpifje. Ai e ka akuzuar Berishën se ka “mendësi vrasëse” dhe se ka rënë në nivele të paimagjinueshme, duke u ofruar të shkojë në SPAK për t’u marrë në pyetje në lidhje me këtë histori.
“Për hallin që ka se mos “vras” Xhafën”, i flet subkoshienca se ka merak se mos “vrasim” Ramën me votë. Burri ka kohë te turpërohet gjithë jeten e vet, por të bier në këtë nivel është e paimagjinueshme dhe është fiks siç nuk e urojnë as kundërshtarët më të ashpër! Shpifje si kjo tregojnë sa të madhe e ka frikën dhe dëshpërimin. Akuzat për vrasje dihet kush i ka mbi shpinë, siç dhe tregon mëndesinë vrasëse sepse dikush që dëgjon këto biseda dhe nuk i denoncon tregon për veten! Meqë ky po e mbështet SPAK këtë periudhë, unë jam i gatshëm dhe i bëj thirrje SPAK të nisë hetimin për tentativë vrasje ose moskallëzim krimi” u shpreh Salianji, i cili kërkon të garojë në zgjedhjet brenda Partisë Demokratike për kryetar të saj.