Drejtësia për Kosovën s’duhet të jetë e verbër – Mesazhi i Spiropalit në Kuvend
Ministrja për Evropën dhe Punët e Jashtme, Elisa Spiropali, u ndal në Kuvend te marrëdhënia me Kosovën, duke e cilësuar atë një përgjegjësi historike dhe kombëtare për Shqipërinë. Ajo theksoi se Tirana do të vijojë të jetë një zë i fortë në mbrojtje të së drejtës së Kosovës, integrimit të saj ndërkombëtar dhe forcimit të pozitës së saj në strukturat euroatlantike, pasi – sipas saj – stabiliteti i rajonit lidhet drejtpërdrejt me një Kosovë të njohur dhe të konsoliduar si shtet.
Duke folur për proceset gjyqësore në Hagë, Spiropali nënvizoi se Shqipëria mbetet e përkushtuar ndaj drejtësisë ndërkombëtare, por ajo duhet të funksionojë mbi bazën e barazisë dhe koherencës, pa u kthyer në instrument interpretimesh të njëanshme historike. Sipas saj, lufta e Kosovës nuk ishte një konflikt për pushtet, por një përpjekje për mbijetesë dhe liri pas një periudhe represioni sistematik, fakt i dokumentuar ndërkombëtarisht.
Ministrja paralajmëroi se drejtësia nuk mund të aplikojë standarde të dyfishta apo të krijojë perceptimin se viktima dhe agresori vendosen në të njëjtin plan moral e historik. Ajo theksoi se çdo proces që lidhet me atë periudhë duhet të zhvillohet me vetëdije të plotë për kontekstin dhe disproporcionin e forcës, përndryshe rrezikon të humbasë legjitimitetin.
“Shqipëria do të mbrojë me dinjitet të vërtetën historike të Kosovës. Drejtësia duhet të jetë e paanshme, por jo e verbër ndaj realitetit”, deklaroi Spiropali, duke shtuar se pa një drejtësi të drejtë nuk mund të ketë pajtim e as paqe të qëndrueshme në rajon.