Vjen mesazhi amerikan! Van Horn takim urgjent me Peleshin në mes të përplasjes me SPAK
E ngarkuara me punë e SHBA-së në Tiranë, Nancy VanHorn, zhvilloi sot një takim rreth 30-minutësh me Kryetarin e Kuvendit, Niko Peleshi, në një moment politik të ndjeshëm për qeverinë shqiptare. Zyrtarisht, biseda u fokusua në forcimin e partneritetit strategjik mes Shqipërisë dhe Shteteve të Bashkuara, veçanërisht në fushën e sigurisë dhe bashkëpunimit euro-atlantik.
Megjithatë, takimi vjen në një kohë kur mazhoranca është në përplasje të hapur me SPAK dhe GJKKO lidhur me çështjen e Belinda Ballukut dhe debatet për kompetencat institucionale. Në këtë kontekst, vizita e përfaqësueses amerikane në Kuvend shihet si sinjal i vëmendjes së Uashingtonit ndaj zhvillimeve të fundit në raportin mes pushtetit politik dhe drejtësisë së posaçme, ndërsa SHBA ka qenë tradicionalisht mbështetëse e reformës në drejtësi dhe institucioneve të saj.