Kuvendi rikthehet nën tension: seanca në 17:00, protestë para Parlamentit
Kuvendi i Shqipërisë çel sot, më 8 shtator, sesionin e ri parlamentar. Seanca plenare nis në orën 17:00, jo në 15:00, dhe ka kryesisht karakter ceremonial. Sipas rendit të ditës, parashikohen hapja zyrtare e sesionit të tretë të legjislaturës së XI-të, miratimi i procesverbaleve të seancave të 27 korrikut dhe njoftimet.
Para nisjes së seancës, mazhoranca dhe opozita u përplasën në Konferencën e Kryetarëve për pagat e magjistratëve, reformën territoriale dhe kalendarin e punimeve. PS e konsideron reformën administrative-territoriale një nga prioritetet kryesore të sesionit, ndërsa PD kundërshton një proces të njëanshëm.
Në të njëjtën orë, 17:00, është thirrur edhe një protestë qytetare përpara Parlamentit. Aktivistja Arvina Lleshi ka bërë thirrje për pjesëmarrje masive, duke kërkuar dorëheqjen e kryeministrit Edi Rama dhe duke deklaruar se klasa politike nuk i përfaqëson qytetarët. Gjatë paradites u zhvillua edhe një tubim i vogël pranë Kryesisë së Kuvendit.
Policia ka marrë masa të shtuara sigurie dhe ka vendosur barriera metalike në rrugët pranë Kuvendit, në pritje të protestës dhe mbërritjes së deputetëve.