SPAK drejt një vendimi të ri për Ballukun? Braho: Hetimet vijojnë, askush nuk është imun
Kreu i SPAK, Klodian Braho, ka lënë të hapur mundësinë e një vendimmarrjeje të re në çështjen ndaj ish-zëvendëskryeministres Belinda Balluku, duke konfirmuar se hetimet kanë vijuar pavarësisht refuzimit të mëparshëm të Kuvendit për autorizimin e masës së kërkuar nga Prokuroria e Posaçme.
Gjatë një raportimi gati katërorësh në Komisionin për Nismat Qytetare, Braho u pyet nëse SPAK mund t’i drejtohet sërish Kuvendit me një kërkesë për Ballukun. Ai shmangu dhënien e detajeve për shkak të sekretit hetimor, por deklaroi se hetimet nuk janë ndalur dhe se në një moment të mëvonshëm Prokuroria do të ketë një “vendimmarrje përkatëse”.
Raportimi u shoqërua me përplasje me deputetët e opozitës, të cilët akuzuan SPAK-un për standarde të dyfishta, veçanërisht në trajtimin e krimit zgjedhor. Braho i hodhi poshtë këto akuza, duke deklaruar se Prokuroria e Posaçme nuk vepron mbi perceptime apo përkatësi politike, por vetëm mbi bazën e provave të administruara në dosje.
Sipas kreut të SPAK, krimi zgjedhor mbetet një fenomen shqetësues, por një çështje mund të përfundojë me akuzë vetëm kur hetuesit sigurojnë prova të mjaftueshme. Ai garantoi se kushdo që të jetë i përfshirë, nga cilido krah politik, do të mbajë përgjegjësi nëse provat e mbështesin akuzën.
Braho u pyet gjithashtu nëse kryeministri Edi Rama kishte ndërhyrë për të shtyrë veprimet e SPAK-ut në çështjen Balluku. Përgjigjja e tij ishte se çdo person që disponon prova për një ndërhyrje të tillë duhet t’i paraqesë ato në Prokurorinë e Posaçme, duke theksuar se të gjithë janë të barabartë përpara ligjit.
I pyetur edhe për mundësinë e hetimit të Ramës në lidhje me kallëzime të tjera, përfshirë çështjen e quajtur nga opozita “Albanian Files”, Braho deklaroi se “asnjë person nuk është imun”, por se SPAK mund të veprojë vetëm mbi bazën e provave konkrete.
Një tjetër çështje e ngritur në komision ishte ajo e takimit të pretenduar në Aruba. Braho konfirmoi se bëhet fjalë për një çështje në hetim dhe tha se në SPAK asnjë provë nuk mund të lihet “në gjumë” pa u verifikuar.
Në përfundim, kreu i Prokurorisë së Posaçme tha se fakti që SPAK kritikohet si nga mazhoranca ashtu edhe nga opozita është, sipas tij, një tregues se institucioni po ndjek rrugën e duhur. Mesazhi i tij kryesor ishte se vendimmarrjet e SPAK-ut nuk përcaktohen nga presioni apo pritshmëritë politike, por nga nevojat e hetimit dhe fuqia e provave.