Prishtina në këmbë për UÇK-në! Mijëra qytetarë marshojnë me thirrjen: “Drejtësi, jo politikë!”
Në Prishtinë u mbajt një marshim i madh qytetar në mbështetje të ish-krerëve të Ushtrisë Çlirimtare të Kosovës (UÇK) që po gjykohen në Gjykatën Speciale në Hagë, paralelisht me festimet e 18-vjetorit të Pavarësisë së Kosovës. Marshimi u organizua nga platforma “Liria ka Emër” nën moton “Drejtësi, jo politikë!” dhe mblodhi mijëra qytetarë nga e gjithë Kosova dhe trojet shqiptare, të cilët kërkuan drejtësi për ish-udhëheqësit e UÇK-së që përballen me akuza për krime lufte.
Pjesëmarrësit valëvitën flamuj të Kosovës dhe të UÇK-së, ndërsa sheshi “Skënderbeu” dhe rrugët qendrore u mbushën me thirrje mbështetëse dhe mesazhe si “Lufta jonë ishte e drejtë” dhe “UÇK – nderi i kombit”. Demonstruesit theksuan se lufta çlirimtare nuk mund të konsiderohet krim dhe se procesi në Hagë nuk duhet të shkëputet nga konteksti historik i luftës për liri.
Në marshim morën pjesë familjarë të të akuzuarve, veteranë, ish-luftëtarë, përfaqësues të shoqatave të dala nga lufta, si dhe figura nga komuniteti kulturor dhe artistik. Organizatorët deklaruan se protesta ishte paqësore dhe synonte të dërgonte një mesazh simbolik në një ditë me ngarkesë të lartë kombëtare si 17 Shkurti. Aktiviteti u zhvillua nën masa të shtuara sigurie, pa incidente, dhe u mbyll me thirrje për drejtësi të paanshme dhe respektim të sakrificës historike të luftëtarëve të UÇK-së.
Marshimi u zhvillua disa orë pas ceremonisë solemne në Kuvend dhe paradës së forcave të sigurisë, duke i dhënë 17 Shkurtit jo vetëm karakter festiv, por edhe dimension të fortë qytetar dhe politik.