Bisedime të mundshme SHBA–Iran: pritet një “përparim” brenda 48 orëve, thonë burime pakistaneze
Irani “ende heziton” të marrë pjesë në bisedime “pa garanci të caktuara”, përfshirë përjashtimin e programit raketor dhe kërkesën për kompensim, thanë burime të Ministrisë së Jashtme për Anadolu
Një “përparim” pritet brenda 48 orëve në lidhje me bisedimet e mundshme mes SHBA-së dhe Iranit për t’i dhënë fund luftës aktuale, por Teherani “ende heziton” të marrë pjesë në negociatat e propozuara pa “garanci të caktuara”, thanë të mërkurën për Anadolu burime nga Ministria e Jashtme e Pakistanit.
“Po zhvillohen përpjekje nga ana e Pakistanit, Turqisë dhe Egjiptit për të bindur të gjitha palët, veçanërisht Iranin, i cili ende heziton të hyjë në bisedime pa garanci të caktuara,” tha një zyrtar i ministrisë.
Udhëheqja e lartë pakistaneze, përfshirë kryeministrin Shehbaz Sharif dhe ministrin e Jashtëm Ishaq Dar, janë në kontakt të vazhdueshëm me udhëheqjen iraniane për t’i bindur të marrin pjesë në negociata, sipas zyrtarit, i cili foli në kushte anonimiteti për shkak të ndjeshmërisë së çështjes.
Zyrtari theksoi se Teherani “mbetet i vendosur në kërkesat e tij”, duke kërkuar garanci që nuk do të ketë operacione të tjera ushtarake kundër Iranit, që programi i tij raketor të mos përfshihet në bisedime, si dhe kompensim për dëmet e shkaktuara nga SHBA dhe Izraeli.
Sharif deklaroi të martën se Islamabadi është “gati” të presë bisedime “domethënëse dhe përfundimtare” mes SHBA-së dhe Iranit për një “zgjidhje gjithëpërfshirëse” që do t’i jepte fund luftës në Lindjen e Mesme.
Shefi i ushtrisë pakistaneze, gjenerali Asim Munir, foli gjithashtu të dielën me presidentin amerikan Donald Trump për luftën në vazhdim, ndërsa Pakistani ka propozuar veten si vend pritës për një samit të mundshëm mes zyrtarëve të lartë amerikanë dhe iranianë, në kuadër të përpjekjeve të tij diplomatike.
Bisedimet mund të jenë me shtrirje më të gjerë
Të hënën, Sharif zhvilloi një bisedë me presidentin iranian Masoud Pezeshkian, duke kërkuar përpjekje “kolektive” për uljen e tensioneve dhe rikthimin te dialogu dhe diplomacia mes vendeve fqinje.
Ndërkohë, Rafael Grossi, kreu i Agjencisë Ndërkombëtare për Energjinë Atomike, deklaroi të mërkurën se pret që SHBA dhe Irani të zhvillojnë bisedime këtë fundjavë në Islamabad, duke shtuar se negociatat pritet të kenë një shtrirje më të gjerë.
Duke folur për gazetën italiane Corriere della Sera, Grossi tha se diskutimet pritet të përfshijnë çështje si raketat, milicitë e lidhura me Iranin dhe garancitë e sigurisë për Teheranin.
“Këtë herë, në tryezë do të jenë edhe raketat, milicitë aleate me Republikën Islamike dhe garancitë e sigurisë për Iranin,” u shpreh ai.
Më herët, burime në Islamabad kishin bërë të ditur për Anadolu se një delegacion amerikan pritej të mbërrinte në Pakistan këtë javë.
Sulmet ajrore të SHBA-së dhe Izraelit ndaj Iranit që nga 28 shkurti kanë vrarë mbi 1,340 persona, përfshirë edhe liderin suprem të atëhershëm Ali Khamenei.
Teherani është kundërpërgjigjur me sulme me dronë dhe raketa ndaj Izraelit, si dhe ndaj Jordanisë, Irakut dhe vendeve të Gjirit që strehojnë baza ushtarake amerikane, duke shkaktuar viktima, dëme në infrastrukturë dhe ndërprerje në tregjet globale dhe trafikun ajror.
Të paktën 13 ushtarë amerikanë janë vrarë dhe dhjetëra të tjerë janë plagosur gjatë konfliktit në vazhdim./ AA
