Netanyahu në panik? I kërkon ushtrisë të ‘shesë bukur’ luftën me Iranin te publiku!
Kryeministri Benjamin Netanyahu ka shprehur frustrim të hapur gjatë mbledhjes së kabinetit të sigurisë, duke pretenduar se arritjet madhore të operacionit “Luani ulëritës” kundër Iranit nuk po u shpjegohen qartë qytetarëve.
Netanyahu i ka kërkuar Shefit të Shtabit, Eyal Zamir, që të thjeshtojë gjuhën e komunikimit dhe të organizojë një prezantim më efikas të rezultateve ushtarake, pas shpalljes së armëpushimit dy-javor.
Sipas kryeministrit izraelit, operacioni ka arritur suksese që deri dje dukeshin imagjinare, duke goditur rëndë programin bërthamor, industrinë e raketave ballistike dhe infrastrukturën ekonomike të Teheranit, përcjell Ynet.
Netanyahu theksoi se Irani është sot më i dobët se kurrë, ndërsa Izraeli më i fortë, duke shtuar se janë shkatërruar jo vetëm raketat ekzistuese, por edhe fabrikat që i prodhojnë ato.
Pavarësisht toneve triumfaliste të qeverisë, liderët e opozitës kanë lëshuar akuza të rënda, duke e cilësuar armëpushimin si një katastrofë diplomatike.
Yair Lapid deklaroi se Netanyahu e çoi vendin drejt një kolapsi strategjik, duke humbur mundësinë për të rrëzuar regjimin apo për të eliminuar përfundimisht kërcënimin bërthamor. Sipas Lapid, kryeministri i mashtroi qytetarët me premtime për fitore totale, ndërkohë që Trump po bën marrëveshje mbi kokën e Izraelit.
Edhe ish-kryeministri Naftali Bennett u bashkua me kritikat, duke vënë në dukje se objektivat kryesore, si çmontimi i plotë i programit bërthamor dhe largimi i 460 kilogramëve të uraniumit të pasuruar, nuk u arritën. Bennett akuzoi qeverinë se u shiti iluzione qytetarëve, pasi Hamasi, Hezbollahu dhe Irani janë ende në këmbë.
Mbrojtja e ushtrisë
Në anën tjetër, zëdhënësi i IDF-së, Effie Defrin, mbrojti rezultatet e fushatës, duke deklaruar se ushtria i ka përmbushur dhe tejkaluar të gjitha objektivat.
Ai listoi shkatërrimin e sistemeve të komandimit, eliminimin e mijëra operativëve dhe goditjen e flotës detare iraniane si prova të suksesit.
Megjithatë, një mbledhje e posaçme pritet të mbahet javën e ardhshme mes krerëve të mbrojtjes dhe ministrit Israel Katz për të koordinuar më mirë mënyrën se si këto arritje do t’i prezantohen opinionit publik, i cili mbetet i ndarë mbi vlerën e këtij armëpushimi të përkohshëm.