Lufta Izrael-Hezbollah vret një anëtar të forcave paqeruajtëse të OKB-së në Liban
Një incident i rëndë ka tronditur misionin paqeruajtës të Kombeve të Bashkuara në Liban, ku një efektiv ka humbur jetën dhe tre të tjerë janë plagosur pas një goditjeje me artileri pranë një prej pozicioneve të tyre.
Ngjarja ndodhi vonë të dielën, kur një predhë ra në afërsi të një baze të UNIFIL-it, duke shkaktuar viktima në radhët e trupave paqeruajtëse. Autoritetet indoneziane konfirmuan se viktima ishte pjesë e kontingjentit të tyre, ndërsa tre ushtarë të tjerë mbetën të plagosur gjatë sulmit.
Ministria e Jashtme e Indonezisë bëri me dije se goditja erdhi si pasojë e zjarrit indirekt të artilerisë, duke shtuar shqetësimet për përshkallëzimin e situatës së sigurisë në zonë.
Në një reagim zyrtar, autoritetet në Xhakartë shprehën dhimbjen e thellë për humbjen e jetës së paqeruajtësit, duke e cilësuar atë si një sakrificë në shërbim të paqes dhe sigurisë ndërkombëtare.
Indonezia dënoi ashpër incidentin dhe kërkoi zhvillimin e një hetimi të plotë dhe transparent për të zbardhur rrethanat e ngjarjes.
Ky zhvillim vjen në një moment tensioni të lartë në rajon, duke ngritur pikëpyetje mbi sigurinë e forcave ndërkombëtare të vendosura në terren.