Koreja e Jugut dënon me burgim të përjetshëm ish-presidentin
Një gjykatë në Seul, Kore e Jugut, ka dënuar ish-presidentin Yoon Suk Yeol me burgim të përjetshëm, duke e gjetur fajtor për udhëheqje të një kryengritjeje dhe shpallje të gjendjes ushtarake në dhjetor 2024. Vendimi erdhi nga Seoul Central District Court, e cila konstatoi se Yoon kishte përdorur forcën e ushtrisë dhe policisë për të rrethuar Asamblenë Kombëtare, për të penguar funksionimin e saj dhe për të tentuar arrestimin e figurave kryesore politike, duke cenuar rendin kushtetues dhe duke çuar vendin në një nga krizat më të mëdha politike në dekada. Për këtë shkak ai u shpall fajtor për kryengritje, një akuzë që sipas ligjit korean mund të çojë deri te vdekja apo burgim i përjetshëm, por gjykata zgjodhi këtë të fundit meqë deklarata ushtarake zgjati vetëm rreth gjashtë orë para se të hiqej nga parlamenti.
Dënimi ndaj Yoon është i pashembullt për një ish-udhëheqës të zgjedhur demokratikisht në Korenë e Jugut dhe shënon një pikë kyçe në historinë e vendit. Prokurorët kishin kërkuar dënimin me vdekje, por kjo nuk u zgjodh për shkak të mungesës së viktimave dhe praktikat e vendit, ku ekzekutimet nuk janë kryer që nga viti 1997. Përveç tij, edhe ish-ministri i Mbrojtjes, Kim Yong-hyun, u dënua me 30 vjet burg për përfshirje në planifikimin dhe ekzekutimin e tentativës për gjendje ushtarake. Yoon ka mohuar akuzat dhe ekipet e tij ligjore kanë paralajmëruar për ankimim, ndërsa vendimi ka ndezur debate të gjera në shoqërinë koreano-jugore për rëndësinë e sundimit të ligjit dhe ruajtjen e demokracisë në vend.