Administrata Trump shpall “zonë lufte” Çikagon, dërgohen 300 trupa të Gardës Kombëtare
Administrata e presidentit Donald Trump ka cilësuar qytetin e Çikagos si një “zonë lufte”, duke justifikuar vendimin për dërgimin e trupave të Gardës Kombëtare në qytet. Ndërkohë, një gjykatës federal ka bllokuar përkohësisht dërgimin e forcave ushtarake në qytetin e Portlandit, një tjetër qendër urbane e drejtuar nga demokratët.
Ministrja për Sigurinë e Brendshme, Kristi Noem, ka akuzuar kryetarin demokrat të Bashkisë së Çikagos, Brandon Johnson, se “gënjen për të mbrojtur kriminelët”, ndërsa shtoi se qyteti është kthyer në një territor të kontrolluar nga bandat.
“Qyteti është një zonë lufte, dhe pushteti lokal lejon që kriminelët të marrin kontrollin dhe të shkatërrojnë jetën e qytetarëve,” – deklaroi Noem për mediat.
Ajo shkoi më tej, duke pretenduar se grupe kriminale, kartele dhe organizata të njohura terroriste po financojnë protestuesit që dalin kundër policisë së emigracionit (ICE) në SHBA.
Trump nënshkruan urdhrin për dërgimin e Gardës në Çikago
Të shtunën, presidenti Trump nënshkroi një urdhër ekzekutiv për dislokimin e 300 pjesëtarëve të Gardës Kombëtare në Çikago, me qëllim, sipas tij, “mbrojtjen e pronës publike dhe të agjentëve federalë”.
Ky vendim ka shkaktuar reaksione të ashpra nga opozita demokrate. Senatori Dick Durbin e ka cilësuar lëvizjen si “një përpjekje për të përhapur frikë, jo për të luftuar krimin”.
“Ky president nuk po kërkon zgjidhje për krimin, ai po përpiqet të ndezë zjarrin politik dhe të frikësojë qytetarët,” – tha Durbin.
Nga ana tjetër, guvernatori i Illinois, J.B. Pritzker, deklaroi për CNN:
“Janë ata që po e kthejnë qytetin në një zonë lufte,” – duke iu referuar ndërhyrjes federale. Ai kërkoi tërheqjen e trupave nga qyteti dhe e quajti ndërhyrjen të panevojshme dhe provokuese.
Gjykata bllokon ndërhyrjen në Portland: “Nuk ka rrezik revolucioni”
Ndërsa Çikagoja bëhet qyteti i pestë ku Trump vendos forca ushtarake (pas Los Anxhelosit, Uashingtonit, Memfisit dhe një qyteti tjetër), Portlandi i ka shpëtuar përkohësisht ndërhyrjes.
Një gjykatës federal në Oregon ka ndaluar përkohësisht zhvillimin e këtij plani, duke argumentuar se protestat nuk përbëjnë rrezik për rendin kushtetues dhe se forcat lokale të sigurisë janë të mjaftueshme për të menaxhuar situatën.