Tjetër goditje për Merz: AfD e para, CDU prek fundin historik në Gjermaninë Lindore
Partia e kancelarit gjerman Friedrich Merz ka pësuar një goditje të fortë në dy zgjedhjet rajonale të zhvilluara në Gjermani, ndërsa Alternativa për Gjermaninë (AfD) ka forcuar ndjeshëm pozitat e saj në lindje të vendit. Sipas exit poll-eve të transmetuesit publik ARD, në Mecklenburg-Vorpommern AfD renditet forcë e parë me rreth 37% të votave. Social Demokratët (SPD) ndjekin nga afër me 35.5%.
Rezultati më i rëndë regjistrohet për CDU-në e kancelarit Merz, e cila vlerësohet të ketë marrë vetëm 5.5% të votave. Nëse konfirmohet, ky do të ishte rezultati më i dobët i CDU-së në një palë zgjedhje rajonale që prej vitit 1949.
Me pragun elektoral të vendosur në 5%, mbetet për t’u parë nëse CDU do të arrijë të sigurojë përfaqësim në parlamentin e landit.
Për AfD-në, rezultati në Mecklenburg-Vorpommern konfirmon forcimin e saj në landet lindore të Gjermanisë. Megjithatë, edhe nëse rezultatet përfundimtare e konfirmojnë si forcën më të madhe, marrja e drejtimit të qeverisë rajonale mbetet e vështirë, pasi partitë e tjera kanë përjashtuar deri tani mundësinë e një koalicioni me të.
Edhe zgjedhjet në Berlin sjellin një rezultat negativ për CDU-në. Sipas exit poll-it të ARD, partia e majtë Die Linke kryeson me rreth 24.5% të votave, ndërsa CDU renditet e dyta me rreth 20%.
Rezultatet paraprake në dy landet po ndiqen me vëmendje edhe në nivel federal, pasi shihen si një test politik për qeverinë dhe për lidershipin e Friedrich Merz.
Nëse shifrat e exit poll-eve konfirmohen nga rezultatet përfundimtare, ato do të shtojnë presionin mbi kancelarin, në një kohë kur AfD po zgjeron mbështetjen në lindje të Gjermanisë dhe CDU përballet me sfidën e frenimit të humbjes së elektoratit.